ما هي أهم عاداتك اليومية؟

موضوع: ما هي أهم عاداتك اليومية؟ 2010-02-24, 00:55

مساء الخير يا اخواتي الحبيبات

اليوم خطر على بالي نناقش بعض العادات التي لا غنى لنا عنها في حياتنا اليومية, عادات جمالية مثلا عادات تخص النظافة أو عادات غذائية...

ايش رايكم وممكن مع الردود نستفيد من بعض ونأخذ من بعض عادات مفيدة,,,,, في انتظار ردودكن

ما هي أهم عاداتك اليومية؟ 654782

كيف اختنا مها مافهمتش الموضوع سامحيني
وبالنسبة ليا حسب مافهمت موضوعك ماعنديش عادات معينة كلها نفس الروتين اليومي
لكن ممكن توضحي موضوعك أكثر على ضوءه نرد عليك

بارك الله فيكي اختي امان

انا مثلا كنت متعودة أشرب شاي بعد الغدا ضروري, مع الوقت خففت منه لأنه الشاي بعد الغدا ضرره أكبر من نفعه

مثلا أهتم بشعري وأدهنه بالزيت في الأسبوع من مرتين لثلاثة

هكذا يعني عادات مفيدة نتعلمها من بعض او عادات حابين نبطلها ونستفيد من بعض او عادات ما عارفين هل مفيدة أو لأ لكن تعودنا عليهاو يعني

الموضوع تثقيفي أكثر منه نقاش, نستفيد من بعض ونتعلم من بعض امور جديدة

حلو موضوعك مها ..... وانا من العادات اليومية مثلا... لكن مش عارفة انتي قلتي العادات التي يمكن الاستفادة منها مش عارفة حتسفيدو منها والا لا ان في الليل ولما يكون الجميع طبعاً راقد اول حاجة انديرها نمشي للمطبخ ونشوف اي شيء للاكل ونقعد نسهر بعدها ههههه
ولنا عودة لباقي العادات cyclops

كل امل ياشينك طبع عندك
هههههههههههههه
ما هي أهم عاداتك اليومية؟ 597124

انا عن نفسى العاداة انى اول مانوض من سريرى نفتح النت والله ربى بالينى بيه
المهم مفتوح ونطم انه فيه نت ولا لا

والعادة السيئة اللى علمتها لصغارى انهم ميفطروووووووووش الى بعد الساعة 12

حاولت معاهم لكن مافيش فايدة

وياما جاياتك من عادات سيئة عندى

واحلى عادة فيا انكم تستفيدو منها
وهى انك تقرى القران بعد الفجر وقبل ماترقدى
تعرفو لو مقريتش قران قبل منرقد نطوووووووووووووول بش يجينى نوم

جربيها اسبوع وبس وتوا تشوفى

ما هي أهم عاداتك اليومية؟ 805105

الله يجبر بخاطرك يا كلي أمل والله فكرت اسكر الموضوع من شوية, لأنه ما في تفاعل أبدا,الموضوع وقصدي منه ما فهموه العضوات الظاهر, لكن انتي رديتي بارك الله فيكي, قصدي أي عادة متعوده عليها مش ممكن تستغني عنها خلال اليوم وانتو تحكموا في الموضوع زي ما تحبوا... وديروا دفة النقاش

ما شاء الله عليكي يا أم الشيماء

قراية القرآن كفاية لمحو أي عادة عندك مش عاجباكي ما شاء الله تبارك الله, ومرحبا بيكي في الموضوع

وبالنسبة للصغار ممكن تعوديهم يشربوا ماء مذاب فيه شوية عسل لحد ما ييجي وقت الفطور

المشكلة انهم من الساعة 7 ونص فاتحين عيونهم
نعطيهم بسكويت ومعها مرات تفاحة لكن ميبوش يفطرو المشكلة انا عندى وقت المدرسة يمشو من غير فطول تفاحة بس ياكلو ولا موز

ما هي أهم عاداتك اليومية؟ 805105

لو أكلوا موزة مع كوب حليب كويس

ولو زديتهم ملعقة عسل ممتاز جدا لأنهم أكيد بيفطروا في المدرسة

موضوع جميل بارك الله فيك اما عنى العادة الباهية زى ما نتوقع انى انوض بكرى عادة قبل الفجر وانوض البنات باش يلحقو على ركعتين قيام ربى يحفظهم وما ننساش طاسة المية المدوب فيها العسل لزوجى وللصغار الصغيرين وحاجة تانية لما نقضى ديما نستغفر ولما نطيب ندعى ربى يجعل فيه بركة وشفاء من كل داء وعن العادات السيئة ربى يقدرنا ونكونو زى ما يحب ويرضى ولكن اكثر عادة سيئة فية نتمنى نتغلب عليها وهى شؤ ادارة الوقت

اسوء عادة عندي اني استيقظ متأخرا انا اشعر اني متعبة دائمااا!
و افضل عادة يوميا افتح القران اول ما استيقظ!
افقضل ميزة بالنسبة لزوجي في اني لا أحب التسوق و السواق
و اسوء شيء بالنسبة له اني لا ادير وقتي بشكل منظم.
افضل شيء ان اعتمد جدول غذائي منوع

و أسوء شيء اني اشرب القهوة في الوقت و غير الوقت

o lkm

مها انا مادخلتش للموضوع لاني واللهي مافهمته يعني شنوا بالضبط لكن توا فهمت وليا عوده لان متعوده ع التفصيل طبعا دوتي واجدددددده ههههههههههه توا انكمل الغذاء

موضوع جميل مها

من عادتي قهوة الصبح ضرووووووووووووووورى جدا وبماني نشتغل نشرب في شغلي لانه نطلع بكري من الحوش فاهم شي القهوه باش نشتغلو صح ما هي أهم عاداتك اليومية؟ 96877

تاني شي قراية القران ضروري كل يوم نقرا قران

وبدت عادة جديده توا ليا 3 اشهر كل سبت واثنين واربعاء نمشي نادي رياضي نتمرن والحمد لله ماشيه تمااااااااااااام

وهذا لتوا ما هي أهم عاداتك اليومية؟ 805105

السلام عليكم انا اول عاداتى لزم نشرب القهوة وطبعا قراءة القران نحب التسوق هلبه فوق الحد ولنا عودة o lkm

والله موضوع حلو هدا وين شفته من العادات الحسنة عندى استيقظ الساعة السادسة صباحا بيش نجهز الفطور لان صغارى وراجلى يطلعوا بكرى وبعدين نصلى ونقراء القران حتى وقت خروجى للشغل وبعد الرجوع للبيت تطييب الغداء والضم والعدة السيئة عندى نرقد بعد الغداء هلبة نطمن فى روحى ونقول بيش يتجدد نشاطى

ما شاء الله عليكن أخواتي والله ردودكن أكثر من رائعة وتخلي الوحدة منا تتعلم من التانية أهم عاداتها الطيبة جعل اللع كل كلمه منكن في ميزان حسناتكن, ونفع بها الباقيات أنا الآن فخورة بهذا المنتدى الطيب وبأخواتي الرائعات... ولازم يا أم الشيماء تفتخري بعضوات منتداكي بل منتدانا كلنا هههههههههه

مداومة قراءة القرآن ما شاء الله ركعتين قيام ليل تبارك الله استيقاظ بارك وغيره

وبالنسبة للقهوة لو كانت فنجان واحد ينصح بيها يوميا تعطي نشاط لبقية اليوم بس يا مودة ما تزيدي من القهوة انت

حامل ولو حبيتي فنجان تاني خليه كاكاو بالحليب أو سحلب بالحليب عشان البوبو والكلام لك يا أم الشيماء عارفاك

تحبي القهوة كمان, هههههه ويا أم النبراس أنا زيك لما أكون تعبانه ودايما مرهقة ونعسانه أعرف أن دمي ناقص ا

عملي تحليل وزيدي من الأغذية المفيدو ويار يت تبدي نهارك بملعقة عسل على ماء دافي وكم تمرة بارك الله فيها

الأخت ليبية ذكرتنا بيها ويا مرام بستنى فيكي وأنا كمان زيك بتكلم كتير وهذه من عاداتي الجيدة مع الأولاد لأنهم

يحبوا اللي يكلم فيهم بس مع الكبار الله أعلم هههههههههههههه مش تهربي تردي يعني تردي وبالنسبة للنوم بعد

الغدا يا أم ماب جيدد بس ما يزيد عن ساعة لأنه يقولوا النوم كثير في النهار مش كويس ويا سناء ما شاء الله

عليكي واله نفسي أشترك في نادي بس الأولاد وزوجي ما بعرف لو ممكن تقوليلي اسم النادي وما هي أوقاته

وكمان لو قررت تتركيه ما هي احتياطاتك لتحافظي على اللياقة اللي كسبتيها, ياريت تردي عليا عشان نستفيد

ما هي أهم عاداتك اليومية؟ 589163

شوفى ياقمر
بدايه اليوم اصحى الصبح علشان بنتى تنزل الحضانه وارجع انام تانى واقوم على 11 مثلا افطر زوجى واستنى ينزل علشان اعمل نسكافيه او شاى بلبن وافتح اشربها امام الكمبيوتر ده مزاج عندى كده الصبح وباقى اليوم تنظيف وطبخ والملل الروتينى

بسم الله الرحمن الرحيم

الله عليك يامها ،والله موضوع هدرازي وممتع..جيتي عالجرح من غادى

اما عن عاداتى اللى ليا زمان متبعتها ومنتظمة عليها هي:

اول شئ انديره اول مانفتح اعيونى نشرب على الريق ماء معصور فيه ليم (للمحافظة على الوزن)

ومن منطلق (اتبدلون الذي هو خير بالذى هو ادنى) فأنا ليا مدة مانشربش قهوة بعد العصر وغيرته

بكوب لبن(القهوة نشربها وانا خارج البيت فقط)

والشئ الثانى اللي غيرته هو المشروب الغازي وبدلته بالعصير

(وكنت نشرب فيه فالمناسبات وانا خارج البيت،لكن بعد ماقريت عليه فالمنتدى وعرفت انه فيه مادة من

الخنازير وهو من اجل مساعدة اسرائيل...لغيته نهااااااااااااااااااااااااائي)

والشئ الاخر اللى غيرته انى كنت وانا نقوم بتنظيف لازم انحط قناة اغاني

الحمد لله توه اول قناة نستفتح بيها هى العفاسي للقرآن الكريم

واخيرآ لما نقوم بتنظيف والله وقت الغذاء والله وانا جالسة نرجى النت يفتح

نبقى نستغفر اوانصلى على الرسول (صلى الله عليه وسلم) او اي ذكر ...وطبعآ كله مية مرة

اما سلبيات يومياتى ...هي عدم تنظيم الوقت( انظم وقتى عشرة ايام وبعدين انرد كيف الاول)

هذه مشكلتى بس....

ربنا يخليلك زوجك وبنتك ويزيدك من نعيمه

بارك الله فيكي يا الشيماء

ما شاء الله عليكي يا براءة

انت مثال لتطوير الذات, بارك الله فيكي

شوفي يا مها عاداتي اليومية خليك من شغل البيت التطييب والضم بنقولك عاللي يخصني الرقاد في القايلة بعد الغدا، آخر شي نديره قبل النوم الصلاة ثم قراءة القراءن والاذكار ، وبعد صلاة الفجر عندي ورد.قبل ما نرقد نشقى بجسمي عموما ووجهي خاصة كريمات وماسكات ومن هالامور لأني في النهار ماني لاهية.

بارك الله فيكي أختي زينه فعلا عادات رائعة

أدام الله عليك نعمه تلاوة القرآن والأوراد اليومية

بارك الله فيكي

بسم الله اول العادات اول مانفتح عيوني انقول الحمدلله اني فتحت عيوني واننا بخير وبعدين انقول يارب افرج علينا وعلي كل متضايق بعدها ندخل للمطبخ وندير الفطور ونجهز ه وطبعا قبله انكون صحيت صليت الفجر ورديت نمت وطبعا نجهز بنتي للروضه ونبداء اليوم لازم بالنت نشوف فيه نت او لا ونفتح اول صفحه ع المنتدي طبعا بعدها الطبخ والتنظيف والاطفال وطلباتهم وطبعا اكثر شئ محافظه عليه الاتصال الدوري باهلي وصديقاتي والسؤال عنهم كل فترة وفترة من العادات التي لااعرف هل هي جيده ام سيئة شرب القهوة الان قللت اصبحت اربع فناجين من الاشياء الجيده عندي اتذكر الله دائما لكن لااذكره باللسان كثيرا لااعرف ماهو الحل من عاداتي لااستطيع ان ابقي فترة طويله ان لا اراي صور ليبيا وبالتحديد بنغازي من اسواء عاداتي العصبيه الزائده طول اليوم وبالتحديد مع الاطفال اتمني ان اتركها كل يوم جديد يعتبر جديد بالنسبه لي وابحث فيه عن اكلات جديده لاني احب التجديد واتمني انكون عرفت نتكلم بطريقه جيده

بارك الله فيك عزيزتي مها

بالنسبه للنادي المشتركه فيه اسمه نادي سلطان في غوط الشعال وفي منه في فشلوم وقرقارش
والوقت من الساعه 9 الصبح لعند الساعه 6 مساءا انتى اختاري الوقت المناسب ليك

وبالنسبه للبرنامج لو بطلت انى كنت فيه قبل سنه ووقفت لظروفي والحمد لله مافسدش جسمي زي مايقولو انه النادي ايفسد لالالالالالالا عن تجربه انقولك اهم شي ماتكليش بعد الرياضه بساعتين وكتري شرب ميه والعشاااااء رد بالك منه متاخر وتوازني في اكلك ماتحرميش نفسك ومادلعيهاش هلبا كوني وسطيه نقصي دهون ومقالي والباقي عادي جدا
وصدقنى الرياضه مش لوزنها زايد بس والله حتى الضعيفه تعطيك مرونه نشاط تحسي نفسك خفيفه ماتتعبيش وتدهشي بسرعه اتزيدك نفس وجربي وقوليلي شن ايصير معاك ujt

رجعتلكم مرة تانية بدوشتى

العادات الكويسة اللى عندى نرقد فى صغارى بكرى هههههههههههههه
كلهم يستغربو فيا كيف نرقد فى الصغارى من الساعة 7 والله لما ترقدى طفلك بكرى حتى انت تحسى بنشاط وحيوية مش تقولى تفكيت منه ورقد لالالا
النوم للطفل مبكرا يشعر بنشاط الصبح وحيوية زاايدة ماشاء الله انا على صغارى انرقد فيهم بكرى صح ينوضو بكرى لكن مش مشكلة اهم شئ انهم يرقدو بكرى
ما هي أهم عاداتك اليومية؟ 196708

والسيئة اللى عندى منحبش منو يكلمنى وانا مقعمزه قدام النت يعنى حد من صغارى ولا يرن تلفون دمى ينحرق
هههههههههههههههههه
ما هي أهم عاداتك اليومية؟ 600813

» الأخطاء اليومية السبعة
» نصائح للتخلص من الالام اليومية
» صحتك افضل اذا ابتعدتي عن هذه الاخطاء اليومية
» أفكار ذكية تفيدك فى حياتك اليومية
» أسرار للتخلص من الإجهاد في حياتك اليومية