كشف حساب!

جرت العادة من سنوات طويلة انه في نهاية كل سنة يتم تقديم حصاد كامل ليها فيه اهم الاحداث اللي صارت خلال هالسنة والسنوات ال 10 الاخيرة كانت سنوات عجاف ولله الحمد على العالم عامة معدلات الحروب والنزاعات والجريمة والفساد والجوع والمرض في تزايد حتى انه ظهرت امراض جديدة لم تعرفها البشرية قبلا والبركة في معامل البيلوجية السرية التابعة لوكالات الاستخبارت في الدول اياها! بس مش هذا موضوعي كشف الحساب هالمرة شخصي جداً!
انا وانتي شن كانت خططنا او احلامنا او مشاريعنا في هالسنة اللي مرت وشن اللي حققناه منها ؟
عندك حلم او مشروع مرحل من سنوات وما زال مش قادرة تحققيه؟ شن هو؟
عرفتي الاسباب اللي ورا عدم تحقيق مشاريعك؟ وهذا في رأيي الاهم لأن معرفة الداء نصف الطريق للدواء.
هل احلامك شخصية بالدرجة الاولى ام الهم العام يشكل اولوية عندك؟
انا عن نفسي وبعيداً عن التنظير كل سنة يكون على رأس احلامي ((العريس)) ايه العريس لا تستغربن ولا تضحكن!اتضح ان الامر اقرب للمستحيل بعد طائر العنقاء والغول والخل الوفي!وبعدين تجي باقي القائمة موزعة على امور شخصية واخرى عامة وكالعادة 90% منها لم يتحقق ولله الحمد وتوا اكتشفت السبب
.
.
.
.
.
سقف احلامي عاااالي ...هالسنة بنوطيه!
حتى الاحلام يجب ان تكون واقعية ومنطقية ما يصير تحلمي ببحيرات سويسرا وانتي في عمق الصحراء الليبية صح ؟!
نطلع من السنة المنتهية محبطة ونخش السنة الجديدة ومعي شيء من احباطي هذا ولكني لا استطيع ان امنع نفسي من التفاؤل من ان الآتي افضل ان شاء الله فأنا وان كنت كحال الانسان اسعى للمزيد والمزيد من النعم والخيرات الا اني اصبحت مدركة لما انا فيه من نعمة اقلها اني بصحة ممتازة ولله الحمد هذا غير عن اني نعيش في دولة آمنة لا حروب ولا كوارث طبيعية واعظمها اني ولله الحمد مسلمة ونعمة الاسلام لا توازيها نعمة.
هذا كشف حسابي وانتي شن كشف حسابك للسنة اللي فاتت(نتكلم عن السنة الهجرية ماني قادرة نستنى الميلادية لين اتم ونكتب موضوعي ايدي تحك فيا!)

ام خالد شكرا على الدعم توقعت مشاركات بالجملة بما ان الموضوع يخص الجميع بس الظاهر انه فيه تأخير في استصدار الكشف انا في الانتظاروكل سنة وانتن بخير.

موضوع رائععععععععععععععععععععع

موضوع رائع

ام الشيماء حبيبتي ما تقصري ومعذورة... سنا والمهندسة نورتوا الموضوع بمروركم ومستنيتكم ...ام خالد شكرا مرة ثانية.

عندك حق يا ام خالد الوقت اكبر خسائرنا حتى انا بنحاول معاه ان شاء الله نقدر نستغل جزء اكبر من وقتي في شي مفيد.

موضوع قيم انا معاكم
فعلا الوقت لازم نحاولوا تستغلوه صح وفى الخير ..
وفى حاجة مهمة جدا وهى محاسبة النفس لازم كل وحدة فينا يوميا تحاسب نفسها على كل شئ من ايمانياتها الى اجتماعياتها بعد تحاسب نفسها بصفة دائمة حتعرف فيش غلطت وتصلح وفيش اصابت وتتابع..
وربى يهدينا للصواب

مافيش حد تفاعل بس انا مصرة لانه موضوع قيم
هل اديت فروضك(صلاتك)اليوم فى وقتها وفى جماعة ؟
هل اعطيتى حق القيام والكوع والسجود؟
اللهم ثبتنا على طاعتك

موضوع حلو وشيق

انا عن نفسي مشكلتي مع الحظ .....وايضا البلاده احيانا تتبلد مشاعري ونحس بالاحباط وماعنديش نيه في حتي الدعاء

استغفر الله ...قد يكون من كثرة الاحباطات صار عندي ميكانيزما جديده للخروج من حاله الاحباط للرضي بالواقع

حتي مانصدم مرة اخري

الغريب ان كان عندي اصرار عجيب غريب في التكرار والطلب والرجاء من الله لتحقيق غاياتي وفعلا كانت تتحقق

ولو بعد حين والكل ايقولي نفسك طويل

لكن اللي صارلي صار ...هههههه بالك عين .....هههههه.........اصبحت نخطط ونادرا مايسير

وانا نعترف ان الناس لها تاثير في حياتنا خصوصا كان ايحاء بالفشل ....كان لما قبل حد يقولي مش حتتحقق

كانه يعطيني دافع للتحقيق والعناد

لكن توا اصبح يترك اثاره السلبيه فيه

وفعلا مقصرين مع الله اولا واخيرا ....حتي العباده الخالصه والمتقنه لها دور ايجابي في تحقيق الاحلام

السنه هذي حنحط احلام وطموحات وكل امل انها تتحقق ادعولي وحنقوللكم في نهايه السنه شن تحقق منها

وسمعت من استاذ مصطفي عمرو ان الانسان اذا اراد من الله شي يتصرف مثل الطفل في الترجي والالحاح

والبكاء والتكرار فانها وسيله مؤكده في تحقيق الاحلام

انتمني لجميع العازيات بالازواج الصالحين واللي متزوجه بالذريه الصالحه

موضوع رائع يازينة ربي يوفقك ويحقق كل امانيك ان شاء الله ويرزقك الزوج الصالح

انا دائما نحاول نكون متفائلة ولكن يصير نوع من الاحباط عندما لاتتحقق امنتيتى واو افشل في شى ولكن نحاول انه هدا الفشل ميصيطرش على حياتى ونسعى الى هدف غيره

واهم شى اننا نسعى الى الاكتار من العبادة والتسابيح والصلاة ونحاسب نفسنا دائما عليها لكى تتحقق لنا اهم امنية وهيا امنية الاخرة وحسن الخاتمة

وربي يوفق كل عضوة ان شاء الله