حياة زمان حياة حلوه زينا حياة خلاص راحت عليكم

بسم الله الرحمن الرحيم

حياة زمـان , حياه حلوه زيـنه , حياه خلاص راحت عليكم وعلينا , للأسف احنى ريحناها بإيديـنا




الحياه زمـان , حياه بسيطه , حياه كانت فيها البركه والحنيه , حياه تتفكرها كل ماتسمع على ماضيها اغنيه , حياه كانت فيها الاسامي عيشه وسالمه ولطفيه , مش ماريا و نور و سميه حياه كانو الجيران فيها يدوقو بعضهم ويمدو من كل أكله صونيه , مش زي حياة توا كل واحد لاهي فى رويحته مايتفكرك إلا وقت المناسبه ولا المصلحه بهديه حياة زمان , كانت حياه عاديه مش مكلفه , العشره جني وقتها تعيشك يوم ولا ميه , مش زي توا فى اليوم المية جني تمشى فى شربة إميه حياة زمان حتى العمر كانت فيه البركه , مش زي توا الواحد يموت من تخبيشه حصلها فى عركه زمان تلقى الواحد عمره تمانيين ومازال بصحته , مش زي توا اللى يوصل الخمسين يقعد يلقف بسكره وضغطه وكحته إيامات زمان كانت فى حاجه اسمها إحترام للكبير والصغير والجيران , أمـا توا الاحترام معاش بدي ليه معنى فى هادى الايام


نـاس زمان ورثونا تقاليدهم وعاداتهم وامثالهم , ومايصح اننا ننسوهالهم , حتى ولو بصوره نرسموهالهم



هيـا نبدو رحلتـنا بين زمان وتوا ياقهرتـنا







1- زمان , كان الخير فايض وكل شى متوفر , وسعر الحاجه لا عليها ريقك يشيط ولا تفاوض , كل شى رخيص ومتوفر بالزايد / توا الاسعار نار والخضره كلها من الصوبات لين صحتك تنهار .
2- زمان الصغير يحترم اللى اكبر منه بش دعاوي الخير ياخدهم منه / توا لا عاد في احترام ولا قدر , حتى الدخان يدخنو فيه بالهبل , قدام بوه وخاله واللى اكبر منه .
3- زمان اللبس بسيط , والشعر كاسكو لا ياخد منك جهد ولا وقت فى التمشيط / توا حتى من الالوان تغيرت والموضه تهورت .



1- زمان اللمه يا محلاها , لازم منها كل جمعه بالعاله , تجي للمه بروحك من غير مايقولولك تعالى / تـوا اللمه بدت كان غر فى المناسبات , وساير الايام لا تجيني ولا فى حوشك نبات .
2- زمان الهدرزه كانت على مقادير الاكلات وكيف بوتو للمناسبات / توا الهدرزه كلها على المسلسلات , مهند ونور والمسلسلات التركيه لقني بيها فى كل الاوقات والمناسبات .





1- زمان كانت الدحيّه الوحده تشبع سبعه عايلات , ماهو حتى الدجاج كان يعطي فى الدحيّه من وسط قلبه وخاطره , ياكلو منها ياكلو منها لين تجي عينهم بيضه ويرقدو وهما شبعانيين و شبعانات / توا الجوع ضاربهم على قد ماياكلو وكان اديرلهم بوفى حفلات .
2- زمان حتى طريقة الماكله غير , نحي كندرتك وتجي مربع على المنيدير وتسمى بسم الله وتقول ربي كثر هالخير / توا طول يجي ياكل مفجوع على بطنه ديما مخلوع .
3- زمان كل أكله وليها طريقة أكلها / توا حتى البازين اكلته غيرو شكلها .




1- زمان كل واحد شاقى بهمه , وعلى رزقه عارق حارق دمه / توا فى أبسط حاجه يجيبولك الافريقي حتى من وسخهم يلمه .
2- زمان معودين صغارهم على التعاون والخدمه / مش زي شباب توا عمرهم عمر دجاجه بيضه , ماتعباش عليه حتى يصلحلك بريزه .





1- زمان كل شى إيديرو فيه فى الحوش ويرفعو يطيبو فى الكوش / توا حتى من المقروض يشروه واتي مش هامهم بعسل حقاني ولا مغشوش .
2- زمان الكل يساعد فى بعضه فى وقت العازه والحاجه / توا ماتلقاش من يساعدك كان نفسك ولا الناس اللى عندها فيك مصلحه وليك محتاجه .






1- زمان حياتهم بسيطه , تلقاه يرفع حاجته على الكراطون ولا البرويطه / توا كل واحد يطوق على التانى ومكتر هالحوادث كل يوم والتانى .
2- زمان الناس كلها صصوه , ناس متواضعه مع بعضهم زي الأخوه / توا كل واحد يفخفخ عالتانى زعما زعما عندي حوش فى بن عاشور والدهماني .







1- زمان كانت الحشمه موجوده واللى تبيه وانت عيونك لوطا خوده / توا لا حشمه ولا حشم من صغرهم والمعاكسه ماشيه فيهم فى الدم .
2- زمان مع إن كان فى لبسهم شوية عري , لكن ماتلقاش من يعاكس يبسبسلك يقولك بس بس هي / توا وحتى وانتى لابسه جبه تلقيه وراك يعاكس يعبر على حبه .






1- زمان صغارهم ناشطين مفلفلين , فى الصبح قرايه والعشيه يلعبو فى زنقتهم حفيانيين / توا صغارهم معلمينهم بالبيبي والدلال , وسبيستون وأبطال الديجيتال .
2- زمان ألعابهم النقيزه والزربوط والحبل / توا يبو غر البليستيشن ووالانترنت مايبوش يلعبو ألعاب قبل .
3- زمان صغارهم كلامهم فيه براءه وطفوله واللى يقول كلمه عيب الفلفل فى فمه يحطوله / توا الصغار يعرفو الشيطان وين إيبات , ولسانهم ملوي على رقبتهم ويعرفو أسخف الحاجات .



وهداكـا زمان وهادا زمـان , الحمدلله المهم الواحد عايش متهني صحيح حاله تمـام








ان شاء الله يعجبكم

حاووووووة مش عادية بارك الله فيك
بس احلى شى اغنية ارنجو ليبيريا ليمونى ماندريلا قبل كنا نغنو فيها

باهي مسكين الموضوع شافله حد هههههههههه
فيك بارك الله ستار