مدينة الزهور بهولندا ,** من تصويرى**

السلام عليكم يااخواتى ليا فترة مقصرة معاكم فى المنتدى

اليوم جايبة ليكم مجموعة صور ان شاء الله تعجبكم

كانت عندى حماتى الاسبوع اللى فات ومشينا مع بعض لزيارة مدينة صغيرة فى هولندا اسمها مدينة الزهور

وهذه بعض الصور اللى صورتها مع الشيماء وجنى ومحمد
وضفت لكم صورتين من الكمبيوتر لان الحديقة مش كل الورد خسارة كان مفتوح مشينا كان الجو شويا صقع وفى اللى مسكرين عليه مازال مينفتحش الورد

انخيكم توا مع صور

محلاه المنظر يعطيك الصحة ياام الشيماء وتقولي قلقت وبنروح لليبيا قعمزي هني روحك كان اني في مكانك والله ماعاد نروح من غادي لين نمووووت قتلك ليبيا شني جاب لجاب فرق بين السماء والوطا
ماشاء الله على الترتيب والنظافة والنظام والزهور المتفتحة وصغارك ماشاء الله عليهم زي الورد حدا الورود وخاصة بنتك الصغيرونه سلمها وسلم صغارك كلهم
لكن أنتي قلتي صقع خيرك ملبسة لبناتك شورت من تحت مش صقع عليهم
صحيتي ام الشيماء الصور ماشاء الله واضحات وصافيات يسلمو ايديك وزيدنا صور كان مازال عندك خلي نشوفو هولندا حتى من بعيد نشمو الورد حتى من بعيد

هدى مهبولة ام الشيماء ياامان بتخلى الورد جاية للشوك احنى تعودنا وهدى كيف بدير هى وصغويرتها كان روحت

يانار ى كان لقو وين يطلعوا احنى نستنو فى الجنة الله لاتحرمنا منها يارب


قالك بتروح الله يهنيك قعمزى فى هولندة وريحى روحك بالك احنى انهجو فى الصيف ولا بناتى قريب يهبلو

بالله ياامان وين بتطلعى بيهم بالك تعرفى مكان زى اللى صورتى ام الشيماء

اخيرا ربى يحفظلك صغويرتك وراجلك ويهون عليك غربتك

يا حليلهم ايهبلو شيموش بالجكتره ولقطات وجنون عسول وحمودي الشطانه بتطلع من عيونه هههههههههههههههههه



ههههههههه ضحكتيني امون حتى انى مرات انقوللها روحي خلاص الحق نستاحش فيهم ومرات انقولله ريحي روحك واقعدوا غادي حلوه الحق هولندا في كل شيء في نظافتها ونظام وراقيه الحق لكن حتى ليبيا لو الناس اتصفي قلوبها وتتعلم النظام تلوي جنة والله ربي يحفظها منوره على الصور وخيانه امشيتوا من ورايا

والله ضحكتونى

الله يبارك فيكم ويحفظكم

نبدالكم بحوايج الصيف انا صغارى مصيفين من شهر 3 اللى فات لانهم تعودو على صقع امس مروحين من المدرسة وشدتنا مطرة ومعاها تبرورى وصغارى مصيفين لكن لازم من الكبوط

شوفو جنى لابسة مداس

فى هولندا اى مكان تخشيله سواء محل او مطعم او ممر او اى مكان تلقيه سخوووووووووون وصغارى ميتحملوش السخانة يحرقولى فى دمى يقعدو يحولو فى الكبابيط ويعطونى فيهم جبتها من الاخير نلبسهم صيفى ومافى حد يحول الكبوط

توا ان شاء الله انصورلكم شارع فى هولندا فيه ناس تلقى واحد لابس شال وقوانطى وتلقى واحد لابس تشيرت على اللحم وتلقى لابسة قونة مينى من فوق كبوط كل شئ تلقيه لانه الجو متلخبط

جنان وامان والله عيت من الغربة واستحشت خواتى وامى وتقعميزة العشية ولمة العيلة عيت من التعب والمواعيد واللى تساليها تقولك مافيش وقت والله مرات نقعد باليومين ثلاثة مانمشطش فى شعرى لانه مافيش وقت نبى نروح نبى نرتاااااااااااااااح

ليبيا ليبيا لا وردة ولا شجرة فى هولندا دجى فى مكانها ان شاء الله يارب صغارى ينسجمو بس وانا نتحمل

لكن خوفتونى مافيش وين نطلع بيهم انا ديما شلاكتى فى ايدى وشادة الشارع هههههههههههههههههه

توااا لما ادجى نمشو مانخليهاش فى خاطرك

هههههههههههههههههههههههههه اسالوني انى نبدا لا بسه كبوط وضاربني الصقع وخوي لا بس تي شيرت نص كم وايقولي وين الصقع ههههههههه

جنان على قولتك وين بتمشي ولا بدهوري هيا راس نافورة في المدينة وحديقة في بوستة نحلفو براسهم ومانحنتو وزيده يازايد صارية فيهم حاله من الوسخ ومش مهتمين بيهم وخليك من النافورة معبية شيش ميه فاضية وباكوات دخان وكنينكس ههههههه
يالله ام الشيماء قتلك نبي ليبيا تعرفي ليبيا كانش بتجي على خاطر اهلك شهر من زمان وروحي لهولندا فكك من الهمج والتخلف اللي عندنا
بنت عمتي عايشه في امريكا جت لليبيا تبي تشوف اماليها ثاني يوم قالت بنروح شعفه كان مزلت نجيها
قالت شني البلاد خيرها هكي ولت نبي نعرف كيف متأقلمين على الجو لا نظام ولا نظافة ولا أخلاق ولا معاملة كويسه بين الناس ولا يعرفو يسوق سياراتهم يطلعو في الاحمر
هذي ليبيا ياام الشيماء وانتي جيتي وشفتيها كيف صاير فيها

سناء عطاك ربي مرة مرة ديري في زيارة لهولندا مالا زي حلاتنا

جنان مش بتمشي للعمرة ولا مازال

ربي ايهنيك يا ام الشيماء ويحفضلك صغارك وماتسمعي كلام حد روحي لبلادك الغربة صعبة اسئليني اني فديت من بريطانيا وعييييييييييييييييييييييييييييت الله يحفضك وايسهلنا جميعا انروحو لبلادنا

ربى ينور بلادنا وانشوفوها احلى بلاد وتتطور

وان شاء الله نرجع عن قريب

لكن نمشى ونجى على هولندا

ان شاء اللخ لو استقرت فى ليبيا نمشى لهولندا زيارة ههههههههههههههههه منقدرش نستغنى عن المحلات وتخفيضات هههههههههههههههههه

لمنو بنخلى التخفيضات ههههههههههههه

هههههههههههههههههه صح التخفيضات يعطيهالك اتهبلي

انت مازال ماجبتيش ههههههههههههههههههه

اكيد البيبي يستنا فى تخفيضات

يهبلو كنت نقول لماما ياريتني غادي بنهبل هههههههههههههههههههههههههههههه

أنتو تشمو في الورد واحني نشمو في الكنايس والمجاري حشاكم

باسم الله ماشاء الله مناظر حلو ة وصور الشيماء ومحمد وجنى زادوها بهاءا سلمهم الله وحفظهم .

اللهم اميييييييييييين

اللهم امين

الله يبارك فيكم وفوحتو الموضوع
امان بلعكس هولندا وردها ماتلقيش فيه صنة منظر وخلاص ههههههههههههههه

هههههههههههههههههه
تي حتي المنظر باهي

صور حلوة والمناظر تهبل ربي يحفظلك صغيويرتك

لكن حتى الغربة صعبة ربي يرجعك بالسلامة وتستقري بين اهلك وناسك وحتى انتى يا هدى ترجعى بالسلامة