قصيدة الشاعر زكريا اللبيب عن احداث طرابلس

يا طـرابلس .. ما فيك شى اتهـنّى .... غصباً على اللى قال فيك وفيك ..
لى عــاجـــبه تتــوجعى وُ تْـإنّى ...... عايش على عزّ الشــماته فـيك
مفتن عديم احساس واغلب ظني ..... من يوم يومه , قاتله طـــاريك !!

قادر نزيــــد كــــــــلام ما يمثـلنى ....... كانا المسح يا عروسنا يواسيك ..
ماهمش محضر خيــر ما تسـتـنى ..... يا والعة .. النيــــران ما تطفيك !!
بالجهل جت ارتــــال تســــتوطنى ... وانتى العقل يا طـيْـــبة مربـيك

يحـرم عــليا الشعــــر .. كانه منى .... وحق من نفخ فى الروح روحى ليك
ليك كل شى من غير نبي كـفــنّى .... فيك نندفن و نصــــير من ماضـــيك
ولا تنكـــتب .. نتجـاهلك .. قاتـلنى .... نشوف الفساد اليوم حـاكم فيك
لو يحكموك الموت ما يهـــــادنني .... غير الرصاص وبعدها الكاشيك
مش نمسحه !! تي يصير شن تتمنى .. لا نحسبه لا ليك .. لا موالـــيك
اليوم فــــازعة البلاد وانتى تهنى ..... يا طرابلس كل ليــــبــيا اماليك
والصــــبح للى ينـــاظره متـدنى .... مهما يطول الغبن فى لـــياليك
....
..
الشاعر زكرياء اللبيب

كلام مؤثر أسأل العلي القدير أن يصلح أحوالكم ويؤمن ربوع ليبيا الحبيبة وكل البلاد الاسلامية انه سميع مجيب

ابدعت وكلام مؤلم ربى يهنى بلادى يااااااارب

الله يسلمك أم محمد
ونقول لطرابلس
هيا أمسحى دموعك دمعة وراء دمعة
هيا نورى شموعك شمعة وراء شمعة
هيا أفتحى بابك وطلى على أحبابك
وأن شاء الله اللى جاى خير من اللى فات

ان شاء الله يااااااااارب يسمع منك

آمين