القصة الكاملة منقولة

\ القصة الكاملة لاعتقال سيف الاسلام: كان سيف مختبئ في صحراء اوباري و وديانها بحماية مجموعة صغيرة من التوارق و المقارحة و المجموعة تتكون من ٣ سيارات فقط لعدم لفت الانتباه. كانوا يحاولون الهروب الى النيجر باستخدام طرق غير معتادة للفرار بنجاح و لكن هده الطرق تحتاج الى خبير في هده المنطقة. هناك احد المقارحة مع سيف ابلغهم بانه يعرف شخص خبير في هده المنطقة و هو يوسف صالح الحطماني فتم الاتصال بيوسف و تم اخ...باره ان هناك شخص يريد الهروب للنيجر و سيعطي مبلغ طائل دون اخباره بانه سيف. اتصل يوسف بابناء عمومته مباشرة و ابلغهم عن المكان في احدى وديان اوباري فتوجه مراد اعويدات الحطماني و الهمالي احمد الحطماني بقوة متوسطة و تم الاشتباك معهم و لم يدم الاشتباك الا القليل من ثم استلسموا ففوجئ الثوار بان الشخص الملتم في داخل السيارة هو سيف الاسلام فقبضوا عليه بسرية تامة و اتصلوا بثوار الزنتان لاعلامهم بهدا ( ملاحظة ثوار الحطمان في برقن ينتمون لكتيبة ثوار الزنتان ) فتم ارسال طائرة خاصة اليوم و نقل سيف الى الزنتان. الراوية منقولة من ثوار الحطمان , وصحة لتريس اوبارى والزنتان

سبحان الذي يمهل ولايهمل

الحمد لله الحمد لله

والله خبر اعتقال سيف اليوم فرحني هلبه يما دار في شبابنا

سبحان الله
أختي أريام2004 ممكن نعرف منين جبتي القصة
شن هيا مصادرك لانك قلتي القصة الحقيقية لاعتقال سيف
أو المصدر المنقول منه القصة
مع فائق إحترامي

ايوه يارواسي لو كانت القصة غلط اعطينا الصح لانها نفسها سمعتها من ثوار الزنتان وبرقن
يا رواسي قولي لثوار الزنتان يطلعوه بتصريح يعتذر لليبيين مش يطلعوه باش يزيد يسحن في كبد الليبيين احنا معاهم يعاملوه كويس مش يعطوه الحرية اللي استشهد في سبيلها الاف من خيرة شبابنا لانه هو السبب الرئيسي في عناء كل الليبيين
حرام يعطوه فرصة مازالت باش يتكبر علينا هالمجرم هدا
لاحول ولا قوة الا بالله

معاك ياأريام وانا مقتلكش القصة غلط لاكن كل مرة نسمعها بشكل واللي تأكدت منه بالظبط
أنه مسكوه كتيبة أبوبكر الصديق بقيادة العجمي العتري
وعندي قريبي تابعة للكتيبة هياه
وهو اتصل بينا من الصبح بكري قبل لايطلع الخبر في الاعلان وقالنا على الخبر بس قالنا ماتبلغو حد لين يتم التأمين عليه
وصدقيني هو في الزنتان وخوي شافه بعينه في مطار الزنتان
والزنتان محافظين علي حياته لدرجة كبيرة مش على خاطره هو
ولاكن على خاطر سمعت الزنتان أولا اللي ياما حاولو المتسلقين والطحالب انهم يشوهو سمعت الزنتان
لاكن الزنتان كل يوم تثبت للعالم قداش فيها من تريس متهمهمش المادة لان الطاغية عرض عليهم المليارات وكله بالادلة وعرض عليهم يتقاسم معاهم السلطة وكله بالدلائل وتوا التاريخ يعاود نفسه أن ولد الطاغية عرض عليهم مبلغ هائل من المال أو يضربوه فراسه برصاصة الرحمة أو انهم يأسروه للزنتان
ولاكن زي ماباعوش البلاد فالاول ماباعوهاش فالتاني
وانا نسمع من ناس هلبة "دوة الزنتان خنبوا الزنتان نهبو "حرام هذا تبلي
تي وقت لما كانت فيه الزنتان تعاني من ابسط حقوقها وتقصف في الصبح وفي اليل وانا عشته الحدث بروحي حتى لتونس مامشيتش وقتها الناس تهتف الله ...الخ الخ وتوا واجعتهم الزنتان خنبو الزنتان نهبو
والاهم سمعت ليبيا لان شفتو منظمات حقوق الانسان ومنظمات الدولية والدول الاوروبية والعالم كله شن قالت على الطريقة اللي تعذب بيها معمر فالزنتان مش من أخلاقها تكرر السيناريو مع ولده
واخر كلامي الزنتان ناس يعشقو البطولات ولايحبو الاعلام...........اتعبتم حسادكم يازنتان
وشكرا ليك أختي مرام وسامحيني على الاطالة
بس بنحط النقط على الحروف فالمنتدى اولا وفي ليبيا ثانيا

ما عندنا مانقولو في ثوار ليبيا كلهم بس يا رواسي حتى اللي عدبوا معمر شافوا اللي ماشافوشي خوتنا الزنتان من استباحة مناطقهم واعراضهم فاملموهمش على اللي داروه فيه الله غالب يستاهل اكتر من اللي صار فيه والجمعيات الدولية ما تتكلمش الا على حقوق الطغاة ولكن الناس البسيطة ما تهمهمش
مع تحياتي للزنتان وعربها لانهم فعلا اثبتوا انهم ليبيين عرب اصليين مش كيف ما يقولو عليهم انهم مستعربين

صح معاك يا أريام فالكلام اللي قلتيه بس والنبي سامحيني بندردشو فالموضوع اشوية وياريت العضوات اللي عندها راي تشارك بيه
تعرفي شن خلى الكتائب ماخشوش الزنتان ؟؟؟؟ لان قصة الاغتصاب موضوع لايحتمل وعمره ماصار ومش حيصير وهذا اللي خلى شبابنا يستميتو فالجبهة لانهم واقسم بالله ايقولو العدو امامنا ونسائنا خلفنا واحنا كان فيه خوف وبذات لما نسمعوا فيه جبهة لاكن شبابنا كانو ايقولو باش يرفعو معنوياتنا امتى يخش الجيش الزنتان اعرفوا اللي فالجبهة كلهم ماتو وقالوها لمعمر كانك تبي تحكم الزنتان احكمها قبور
هذا باش كانت الزنتان عصية على الكتائب مع ان معمر كان ناوي يمسحها عن خريطة ليبيا وجابلها جيوش جرارة خبير فرنسي قاللهم جيش يحتل بيه دولة
بس اللي صار لمعمر ماقالش بيه ربي ولارسوله..معاك يستاهل اكثر من هكي بس لما نرجعوا للدين والسنة الرسول (ص)وصى بحسن معاملة الاسرى
وبعدين من يقول الزنتان مستعربين ؟؟؟؟؟
انا نزلت موضوع فالمنتدى قبل الثورة فيه اصول الزنتان ومنين جو وهما اصلهم من شبه الجزيرة العربية من نجد تحديدا وعرب من قبل وحاضر
ومشكورة أختي اريام على رحابة صدرك وإختلاف الراي لايفسد للود قضية

الله اكبر فوق كل طاغية

ههههههههههههههههههه قريت اسمي قلت كنها شكلها غلطت بيني وبين اريام في الرد الاول في الصفحه

الثانيه

يارواسي انت خاشه تحكي علي شي واريام تحكي في شي اخر


اريام ناقله قصه الحق انا قريتها في كل المواقع تقريبا ولما سمعت بعض التصريحات الاغلبيه حكوا نفس الشي

قالوا ان الدليل امتاع الصحراء المذكور هو اللي بلغ عليه.......وحاجه ثانيه وسعوا بالكم ....وانت بانيه افكار

من منتديات اخري او كلام شفتيه مكتوب في اماكن اخري ....ماتعدليش عليه نحنا ماعمرنا درناله قيمه

خلي يحكوا اللي يحكوه لانهم مش الثوار اللي يحكوا هذوم اتباع القذافي ونحنا عارفينهم واغلبهم جيش

الكتروني ومجندين.....وسعوا بالكم حقوق كل المدن محفوظه .....

هههههههههههه
معليش أختي مرام فطنتله الغلط وصلحته
بس القصة مش قصة من اللي شده او لا وكلامك مزبوط ان الدليل هو اللي بلغ عليه مع العلم انه مكانش يعرف انه سيف معلوماته اتقول شخص مهم وبس
بس انا حبيت انقول كلامي اللي فات على خاطر الموضوع فات حده أن الزنتان كدا وكدا
والمشكلة وصلتني رسائل من بعض العضوات هداهم الله تحكي على نفس الدوة
وانا وجعتني رغم التضحيات اللي ضحتها الزنتان وعدد الشهداء بحكم بلدة صغيرة كبير هللللللللبة مقارنة بالمناطق اللي جنبها
يطلع كلام زي اللي ينقال والناس اتصدق فيه ياسر منه
اقل شيء انحاول انفهم اللي معاي الكلام الحق ودرت موضوعين ولحد توا مافيش من رد عليهم
الا المديرة وبس

صدقيني مايحتجش انك اتنزلي موضوع راهو ......نحنا كلنا ليبيين ....واشباه الثوار داروا العار في كل مكان

الحقائق لاتغطي بغربال انا مستحيل نظلم مدينه كامله ع شخص او اثنين زلافيت حشاكم يشوهوا في الثوار

وسعي بالك وانا توا كيف خشيت وقاعده نرد ع المواضيع الاول بالاول ومرات ينقطع النت يريحن المواضيع كلهن