موسوعة الشعر الشعبي متجدد

موضوع: موسوعة الشعر الشعبي متجدد 2010-11-04, 04:08

هذا الموضوع فتحته لاجمع فيه الشعر الشعبي الذي يقابلني ويروق لي
لكي يكون تجميع لتراثنا الذي نعشقه ونهواه وله اصداء حتى على مستوى العالم العربي

وهذه اول قصيدة

عيون سود

للشاعر المهدى إبراهيم مخيون

عيون سود في مُولَى الْخِدْود نِقِيّة*** مِشارِبْ غَذارَة تَاوْ شَبنْ فِية

عيون سود في اللي قُصتَه مَحَرُودَة*** نِظيفْ العَظَا بُوعِينْ تِكْوى سُودة

انْكَانْ نَارْهُم كيفْ نارُنا مِيقُودَة هِيهْ*** ياشقّا اللِّى يُحُجْروا فِى الغَيَّة

عيون سود في اللى حَجّرونِى نَاسَه *** نظيف العظا خوتامْ رُوس خَمََاسَه

وُرَا خالْتي ماينفعوا العَسـَّـــاسة *** الخانِبْ خَنّبْ سلطان يامَدْعِيــــة

عيون سود في اللي صيتْها مِتْعَلِّي *** قَمَرْ زاهُيَةْ تاو السحابْ مْجَلــــــِّى

هَنِي بال من يَضْبَحْ عَلِيكْ تْحِلـــِّـى*** اتْجي حافْلَة في الجّرَدْ والشَّامِيــَّـــة

عيون سود في جَارْةِ الشِّيبانــِــى*** نِظيفْ العظا مولي الغثِيثْ َمتَانـــِــى

حِسَّه كُواني قُلْتْ يادوحانـــِــــى*** نِشْكِي لْمُولَايَ ايرُوفْ عَلـــيـــَّـه

والى اللقاء في قصيدة جديدة

شن درتلك يا نسيبتي كرهتيني * فى الراس حطيتيني * بعد المحبة ليش عاديتيني
شن درتلك من سيه * وشن درتلك من عيب ردي عليا
متغيره لقيتك ومش عاديه * علقتي طواري وين ماشفتيني
انا جيت نبي انردها البنيه * وقبل مانتكلم طول سكتيني

نسيبته :
اسمع كلامي فسرا مدلولا * انا رضيت بيها نسبتك مهبولا
وحرام لشكلك بنتنا نعطولا * بنتي معاك فى حال مايرضيني
انا رميتها فى غوط خالي سبولا * ومالقيت مره حالها يزهيني

الشاعر :
عليا بالهجوم بديتي * ومسرع معايا فى الكلام حميتي
مانيش غالط كيف ماضنيتي * حكمتي عليا غلط وظلمتيني
غير ليش منها نسبتي مليتي * انتي عارفه بالحال وقبلتيني

نسيبته :
قبلت غصبن عني * الله يسامح الشايب اللى خبلني
مسكر دماغك ماتبي تفهمني * انقول برا ايسار تمشي ايميني
بنتي معاك فى حال ماطمني * وديما عليها خاطرى مشقيني

الشاعر :
بنتك معايا فى هنا وسعاده * وتضحك وتلعب دوم كيف العاده
واللى نقصها انوفره فميعاده * وشنهي نقصها وضحي وريني
والخير ديما ان شاء الله فـ زياده * مادام نخدم بـعرق جبيني

نسيبته :
بنتي معاك سنيين شن درتلها * وقداش مره اثاث غيرتلها
رابش عقاب كريهبا شريتلها * الدخان من الماطور بيعميني
انا عارفه للفقر بتوصلها * يصعب عليا حالها يبكيني

الشاعر :
بنتك معايا مااختصت حاجه * وماهيش زيك عل النكد لواجه
ولا ناقصه لاغاز لاثلاجة * وقداش من دولاب فايضه ادراجه
ونوضي انشديها كان كذبتيني

نسيبته :
عيشت الله العازا * شوف اختها اللى عايشه ممتازه
حتا الهاتف غيرت جيهازا * ولت على النقال بتحاكيني
اشبح عديلك خاشها درازا * رصيد بالدولار واسترليني
ماهوش زيك حالته محتاجه * وديما جيوبه خاليه ملاقيني

الشاعر :
تو راك معاي عفنتيها * وماعاد حتى دوتك نبيها
وكان الوليه معاى بترديها * نبي جوابك مختصر تعطيني
وكل وقت عليا حملتك ترميها * وبكل كلمة قاصده اتهينيني

نسيبته :
يالوكان توصل للقمر مشوارك * محال بنتي انردها لدارك
تنسم ادردح والتهي بصغارك * ماعاد وجهك شبحته اتوريني
مليت منها نشفتك وقحارك * بنغلط معاك انكان مش خاطيني

الشاعر :
انتي غالطه والغلط فايت حده * مادامك لبيتي نويتي هده
انتي حرام حتى فيك كلمة جده * مادام عن الصلح صديتيني
الموضوع للقانون نبي انرده * والمحكمة بيناتنا اتصافيني

نسيبته :
خوفتني ضنيتك * وماني فلانه انكان ماقديتك
تندم عليها عملتك خليتك * مادام للقانون بتمشيني
وبالك تحساب انخاف من شخصيتك * عاند معاي انكان متحديني

الشاعر :
انا عارفك منقوبه * قليلة الخير وشيرتك مذهوبه
والشر ديمه تبحثي على دروبه * ولايوم من الايام ريحتيني
من يوم ريتك عيشتي منكوبه * وياريت ماعرفتك ولا عرفتيني

نسيبته :
مسؤل عنها كلمتك هاذيه * انا الاوله بندير فيك قضيه
نقوللهم هالشخص غالط فيا * في وسط بيتى جاى متعديني
وذنبي عطيته بنت ماهي اشويه * حتا لون عيونها زرقيني
بيضه طويله كيف الالمانيه * وشوفو عليها كيف بيجازيني

الشاعر :
انا عارفك مدعي ه * وفى الخبث ليك افكار شيطانيه
وفى الكذب ديما فالحه فنيه * نبي نفضحك للناس خليتيني
قلتي عطيتك كيف الالمانيه * وانتي بلوحه معوجه حذفتيني
ورضيت بقسمة الله عليا * وناصيب بالهول علي داعيني

نسيبته :
شنهي شكلك عاجبا فى روحه * مادام بنتى وصفتها بلوحه
فى الفقر عايش ماك فى بحبوحه * ووجهك يبشر بهموم سنيني
انا قريب نشبح جبهتك مفتوحه * لوكان ماتمشيش وتباريني

الشاعر :
انا قبل مانمشي انقولك مانخبي * ياغالطه بيني وبينك ربي
مادام عكسي فى الطريق ادبي * وما دام هكي ناويه اضريني
الله يجعلك بـ طانطه تنقبي * ولا بجلطه فيك اترزيني

وحرام حتا جنازتك مانصبي * بديتي نسيبت نحس ماتهميني

ماشاء الله حلوات والاحلى العركه بين الراجل ونسيبته هههههههههههههههه جو والله

موسوعة الشعر الشعبي متجدد 437659

منورة سنونة

بارك الله فيك على الرد والاهتمام

موسوعة الشعر الشعبي متجدد 437659

تغيب تغيب!!مع جيتك فيهن أوجاع تجيب يا اللي علي وين ما تغيب
تريح تريح ولا عاد يجيبك دز لا تبريح
نشتاق!!..ونرايف!!..عليك صحيح!!
وتبقى حياتي في ظلام غريب
ما عاد نفرز قول لا تلميح
أمفيت شي عنّك!!..ولو خبر تسريب
فجأة تغيب يصيرلي تطويح
وفجأة تجي تبقى حداي قريب

×

بلاك كاينه!!..وهموم!!..مالتمويح!! وارياف!!..وتعب!!..ويبقى الحال صعيب
والكبد فوق نارك مشت تشليح
طيبتها تحلف قداك طليب
عليه الجفا ناخذ بعد ما انطيح
ضمايد يجيبن جرح قول يطيب
ترجع علي غفله وشوري تميح
تنقّض جروحي والعزوم تخيب

نحلف عليك انسيّبك!!..وانسيح مع طلّتك نحنت يميني انسيب
وبرغم من عطفك علي شحيح
وقل الحنان وشك والترييب
وبالرغم من إنّي معاك جريح
درتك جنيني ريت من ترجيب
حاير بلاك وبيك!!..يا المليح
حيرتني وآنا انسان لبيب
استنتجت نا صوبك أمغير شطيح
وذنب وظلالة ما تصيرش!!..عيب
امغير توبتي صعبت مع التلقيح
وحضرت جنابك عدني تجريب
واخذ ذنوبي والكلام صريح
شكيت للكريم اللي عليم الغيب

×

تغيب تغيب!!مع جيتك فيهن أوجاع تجيب يا اللي علي وين ما تغيب
تعك تعك علي يا اللي فـ كلامي تشك
فيّا تقلب دوم هك وهك
من جمر هجرك نا خذيت نصيب
نربط معاك وفي العهود تفك
ما أسهل عليك البيع والتقليب
يا شمس ضوت في ارجاء الفلك
يا ليل مظلم يا غموض مريب
يا بدر نور درب من سالك
ويا فجر طوّل يا ارياف رهيب
يا جرح غاير في الحشا انسفك
يا طعن في اكتوفي بيد قريب
يا نا علي منّك وكي نفتك
وكي نسيّبك وانت معاي عطيب
لاك لي والله ولاني لك
وأنا نراجى الراس صفى شيب
كبر فاهقك كلي اليوم شبك
معاك يا عزيز اعتدت عالتوكيب
غلاك دالني نا معاك م نملك
رشراش ما نطمع ولو توهيب
نستاهل شقاي وزيد في ادهك
درتك خليل وصارلي التعقيب

تغيب تغيب!!مع جيتك فيهن أوجاع تجيب يا اللي علي وين ما تغيب تعيب

ماليكمش في الشعر الشعبي الباين لكن معليش باقي ماشية ومكملا

قصيده شعريه عالاجواد للشاعر المبروك الزول الحاسي من مدينة شحات حيث قال الشاعر:

لجواد هم لجواد قبل وتالي *** ولجواد هم خلفة اولاد اهلال

ولجواد نزالة الفاو الخالي *** كسابين للطوقه ولام ابهال

مساحة ادموع اللي قصدهم جالي *** أيحاموه بالتراس والخيال

ركابة الشلوق اللي ثمنها غالي *** وانكان لمتا فاجت اتقول غزال

الجيده اللي مسع كسبها والي *** انكان ديرت لازم اترد المال

جيده وفارسا اتقول اهلالى *** ايرد النهيبه والدما شلال

ولجواد هل الزينة مايديروا شينه *** صيتم تعلى فوق ما ينطال

ولجواد ايتنابواعالفخر يزابوا *** لا فيهم بخيل ولا بهم ذلال

ولجواد ايتندوا عالتريس ايهدوا *** دون الكرامة والشرف والمال

ولجوادهل الروفه هل مقام ونوفه *** هنى بال من منهم ايدير خوال

ولجواد اتندى في الرخا والشده *** طقاقة الفواهق كان فك اخلال

ولجواد هم اريادى مرابطين وسعادي *** ابهم في الشهامه تنضرب الامثال

ولجواد كي اترود عالربيع اتهود *** تلقى النجع في الدير العفى نزال

ولجواد ما ايتوانو ان صار ضيق ايبانوا *** لجواد يفزعوا اللي زمانه مال

ونلقانهم ضنا لجواد جو في بالي *** يا بو سليم كان جيت اتسال

ولجواد تمتم اتبان اقبالي *** من حد البحر وايقبلوا مقبال

وهاذول هم لجواد قبل وتالي *** عللهم ايزهي جبده موال

اخطي من ايقول الوطن منهم خالي *** ابخيط الجبل تاثيرهم مازال

الله حلوات كلهم يازوزو واني الصراحة انحب الشعر وخاصة الشعبي وبنساهم معاك

قصيدة هاضا مكان القانا
للشاعر علي شحات الفاخري

هاضا مكان لقانا .. ابكي انكان بكاك جاب منانا نين تنعمي
هانا جاني .. وهانا علي موعد غلا لاقاني
وهانا ورا صوبه ردح ميزاني .. وهانا نطقلي بالغرام لسانه
وهانا اجادلنا بضرب معاني .. وهانا نديم الشوقكاس اسقانا
وهانا حلفلي قال ما ينساني .. وما يود لا والي بود الانا
وهانا بما في داخله شاكاني .. مالشوق م الغلا من لوعته واحزانه
وهانا قريب الدم والبراني .. تعجّب لقوة صدقنا و ايمانه
هانا جينا وهانا .. على الصوب العفيف حكينا
وهانا دفنا حزن ماكن فينا .. وهانا ذرفنا دمع في ملقانا
وزاد هنا م الشوق الدفين شكينا .. وهانا بعد تسكيب كف ابكانا
وهانا الفاهم ما فهم طارينا .. بالغاز نهمسوا م الخوف م الفتانه
وهانا احتار اللي رقيب علينا .. حلل و لكن ما فهم مغزانا
وهانا اللي حساد وقضوا بينا .. وعالوا علي تخريبته مسدانا
وهانا اللي قاس الغلا تكوينه .. صبّا بما جابن يديه معانا
وهانا ونحنا شابكين يدينا .. بكينا بعد حان الوداع اوانا
هانا صار .. ملقا علي موعد غلا بقدار
وهانا وقفنا ضد للتيار .. وبعكس المصار مشا بحسب اهوانا
وهانا اداولنا الحديث اشعار .. وضعنا عفيف الغزل في ديوانه
وهانا الشاكي اللي شكا مالنار .. خففنا مصابه وينما شاكانا
وهانا و نحنا يا زمان صغار .. اضحكنا على اللي ما ارضيه زمانه
واليوم يانا يا زمان كبار .. وانواروا علي لخرين في شكوانا
هاناجيته .. وهانا علي نار انتضار القيته
يراجي و تاعب من امرار رجيته .. و ضحكن عيونه كي اوصلت الحانه
اللي لا يهون و لا نهار انسيته .. ولا تصير لا نقدر علي نسيانه
غالي علي اصاعبت قسميته .. من ناس ما الصوب اسمروا من نيرانه
ومازلت نرجا في كريم عطيته .. كاتب غلاه ايسهله جرنانه
ويجبر خواطرنا و تصدق نيته .. ونيتي و نبنوا من جديد ابنانه
خطرها مكان امنين ما حقيته .. استحضرت ماضي كادني اجحدانه
وسيرة اللي لاعند يوم الميته .. ونا كل يوم نقول حيه فلانه

منورة باش مهندزة ومشكورة على اثراء الموضوع في انتظار مساهماتك الرائعة
بوركتي

في حال حالات حالي...... ولا حال من حَلَََلاتة

ولا حال ينهي اِشْكالِي ...... كان ما ايزيد في حَداتة
في حال كل الليالي .... زي الخل هي مخلياتة
في حال مصمَّت بِِحالي ...... هو حُب ولا شماتة
لو ترُوا كل ما تَرالِي ..... ترى العين ما كان راتة
اللي حالتا زي حوالي ... خير موتا من حياتة
مجروح جرح المِجَالي ... كما الرمش شدُّوا نَعاتة
كالفرس تنعل اِيطالي ..... وكرطوش رقما ثلاثة
على الجرح ياسر عطالي .... والله لو ما اعطيتة
يغيَّر في نظرا اِلـ تالي .... انا كنت قدري مَباتة
ربك الموت بالِاجالي ... اللي مات ما يعرف مماتة
بعد ضاعت من زَهو بالي .... ضحيَّة بكُل البساطة
انا احسبتها رأس مالي ... ولا انظنها بالسقاطة
في النصب والاحتيالي .... فوق رأسها شايلاتة
نا قلبي هاوي هواه الهوى ... هواتا الهاوية وهام في هواها
هواتا الحب اللي فيه انكوى ... صاد الروح وما يصبر بلاها
نا قلبي هاوي هاويه القََدَر ... بات ايفكَّرْ في مناما صَهير
بخاطر زول بو مضحك أغرْ...... عليه ايَّام نصبَّح بِخِير
منَّور وحشها عليا ظهر ...... سواد البخت وسواد المصير
حكمت حكمها عليا صدر .... عبد ينفد والسيد يشير
بِِودِّي مزارها آش مالي خطر ..... كما كان نتوقَّع اِيصير
خسرتا انا وهو كيفي خسر..... كل من كان في أملي كبير
يضمد جرحي ونجتاز الخطر .... يروف بحالتي يكون لي المصير

نا قلبي واهم وعن حبه مُصر .... نصون غلاه للرمق الاخير
ما ننساه طال عمر وقصر .... كما المصباح في نظري تنير
الزين طبيعي ما فيهش غثر ... دون الحالي ولباس الحرير
..... عموم البشر ... وكل ما وصفتها اجمل كثير
غلبت لريل رتاع الوعر .... تبسام رقيق والخشم افطس قصير
كيف الطاووس في طيور المقر ..... حازت على البنوت امير
نا قلبي هاوي هاويه الكساد ..... ليلي طال والنوم ما لفاني
خداني زول من دون العباد ...... مبهدل شيرتي ومصَّرم خبالي
حرام في بعدها يصيدني الرقاد ..... ولا نسيت زول صورتك من خيالي
مهما حازوك عني البعاد ..... ما ننساك يا عز الغوالي
حتى نموت ويحطوا الرشاد ... يقعد حبها هو الاول والتاني
في فراقك قاسيت الشداد ... بكيت ولا لقيت من يرحم بحالي
لمن يا خوت من خيار القياد ..... يخش البر ما يسكنش والي
ازرق لونها يميل للسواد .... لبس لباس من عز القيالي
يبداء حافرة كيف الزناد .... يضوي بعملتا موج الليالي

شهير الاسم سباق العناد .... ركوبك صقر لا يعرف لتالي

انت علتى وانت لداي دواء ..ياللى غلاك ماغيره انريد غلا
انت عمرى .. وانت نديمى فالمجون وخمرى
وانت اللى منك تواقد جمرى .. وانت الجمرى وين جيت لماء
وانت اللى فيدك مسلم امرى .. وعندى معاك الموت كى النجا
المهم انت بالزها تغمرنى .. ياللى ما معا غيرك هناك زها
انت مقصودى .. وانت فى الحياه لاجلك اسباب وجودى
وانت عهودى الصادقه ووعودى .. وانت لقا ووداع يوم لقا
انت وين مانبخل عليك ابجودى .. ودك وحنك لى رد كفا
وانت اللى صوبى عليه تذود .. بعشقك وصدقك تقهر الاعداء
انت الرفق فى صحوتى ورقودى .. وانت لحيرة خاطرى الصفا
انت غلاك مسجله معبودى .. على يازها بالى مدا الحيا
انت مطلوبى .. وانت قدر محتوم فى مكتوبى
وانت المزايا فى وانت عيوبى .. وانت برغم الياس فيك رجا
وانت ثوابى فى الحياه وذنوبى .. وانت اللى عمرى معاك بدا
وانت على شانك عبرت ادروبى .. الشايكه وزادى والرفيق وفا
وانت اللى شلتا متاعب صوبى .. للناصح وللفتان قلت ا لا
وانت اللى منك نويت هروبى .. شورك ومانبى امفيت ارضا
انت روحى .. وانتى اللى عشقك اكتب فى لوحى
وانت اللى تشفى جميع اجروحى .. وانت اللى ودك دوا للدا
وانت الحكايه فى خفاى وبوحى .. وانت القصيده كان ردت اغنا
وانت ونستى فى غربتى فى موحى .. فى وحدتى فى رحلتى لهدا
وانت غموضى فى الحياه ووضوحى .. وانت كل مانملك وانتي نا

مشكورة مهندسة منورة على الشعر الرائع

قلبي عليك ابيض بياض سنونك

للشاعر عمر صقر

قلبي عليك ابيض بياض سنونك ......وقلبـك علـي اسـود سـواد عيـونـك
قــــلــــبــــي عــــلــــيــــك احــــنــــيـــــن.......وقلبـ ك علـي الحـن مـوش امبـيـن
ونـعـتـبــك نـلــقــى جـــوابـــك لـــيـــن........وتـقـول فـيـا مــا اتخـيـب ضنـونـك
ونزعـل عليـك اديرلـي فــي لسـيـن......لـتـقـول طـيــب مـــا نـقــد انـهـونـك
مــــــربــــــي عــــلــــيــــك اكــــبــــيــــده......متمـرو جـه راحـــة طـــروف ثـريــده
وجيتي على شبح العيـون بعيـده.......ومــعــاد جـابـلــي خــبــر تلـيـفـونـك
عــلـــى الله كـــانـــك واده بـــوديـــدة.....يـكــون مـاكــن يكـونـلـي فـيـكـونـك

قلبي عليك ابيض بياض سنونك
قلبي عليك ابيض بياض سنونك ......وقلبـك علـي اسـود سـواد عيـونـك
قــــلــــبــــي عــــلــــيــــك احــــنــــيـــــن.......وقلبـ ك علـي الحـن مـوش امبـيـن
ونـعـتـبــك نـلــقــى جـــوابـــك لـــيـــن........وتـقـول فـيـا مــا اتخـيـب ضنـونـك
ونزعـل عليـك اديرلـي فــي لسـيـن......لـتـقـول طـيــب مـــا نـقــد انـهـونـك
مــــــربــــــي عــــلــــيــــك اكــــبــــيــــده......متمـرو جـه راحـــة طـــروف ثـريــده
وجيتي على شبح العيـون بعيـده.......ومــعــاد جـابـلــي خــبــر تلـيـفـونـك
عــلـــى الله كـــانـــك واده بـــوديـــدة.....يـكــون مـاكــن يكـونـلـي فـيـكـونـك

مفيـت الله ما عنـدي احبـاب ومفيت الصبر ما عندي دوا
* * * *
اصحـاب الود تمـوا لي احـراب واصحاب الكره تموا لي حما
* * * *
وعنـدي ليـل مالدنيـا غيـاب شمسـه فيه ما ضوت وطـا
* * * *
وعنـدي حلـم عايش به سـراب زهـوه عين والباقي جفـا
* * * *
وعندي اصحاب ما كيفهم اصحاب وعندي اعدا ما كيفهم اعدا
* * * *
وعنـدي قلب كي ريش الغـراب وعندي قلب من نوره ضوا
* * * *
وعنـدي عمـر ما طقّـا شبـاب من التقميـط لشّيب العضا
* * * *
وعنـدي مال واصـل به اشعـاب وجا للسـوق ما عنده شرا
* * * *
وعنـدي وطـن ما طقّـا شـراب نسـرح فيه في وقت الظما
* * * *
وعنـدي بيـت خصّنـه اطنـاب اقلال العـرف داروا له سفا
* * * *
وعنـدي كـم داروا له حجـاب بـخط الخـام ما منـا وقا
* * * *
وعنـدي علـم مـرن به اتعـاب وما من نجـم في عزّه هـوا
* * * *
ولاني عفـن ما عنـدي احسـاب ولاني زيـن مشيـول الثنا
* * * *
جـانـا وقـت خيبنـا خيـاب نـا والهبـل تمينـا سـوا
* * * *
وجـانا وقـت خـلانا اربـاب و جـانا وقت خلانا ضـرا
* * * *
وجـانا وقـت خلانا اخصـاب وجانا وقت خـلانا حشـا
* * * *
وجـانا وقـت خـلانا ديـاب وكلت يوم والباقـي صـوا
* * * *
وجـانا وقـت ما درنا منـاب نلمـوا اليوم في وجبه عشـا
* * * *
وجـانا وقـت جـلانا غـراب فتنـا الوطـن ولقينـا وتـا
* * * *
وجانا وقـت جاب لنا اكسـاب الطيّـب راد والفاجـر طغـي
* * * * *
يدور الدهر ما عنده اسباب وروس الناس خلاهم اشطاب الجاهل فيه للعالم فتي
لا مــال لا فـزاعــه ملا وخيـده يا نهار وداعـه مـا لقيـت لـك

قصيدة للشاعر مراد البرعصى

رائع يا المهنسة

ماشاء الله منورة موسوعة الشعر الشعبي متجدد 437659

ماشاء الله عليكم زوزو ومهندسه متابعه لكن ماعنديش عليه الشعر الشعبي لاسف لكن ماشاء الله عليكم منورين

منورة سنسن وينك من مدة مريحة
مشكورة على المرور

والله لو جابو ا جميع الجميلات ........من الإمارات من اليمن وارض الخليج

والقاهرة مع لبنان ما تكفــــــين ........ودمشق والمغرب وتونـــس وعمـــــــان

وبنت الجزائر والعراق وفلسطين.......وبنات افريقيا وبنجلادش والافغــــــــان

واسلام اباد وهندها والفلبيــــــن........ وبنات جاكرتا مع الترك وايـــــــــــران

والبوسنة مع كوريا وبنت برلين .........وبنت البرازيل وفرنسا والالمـــــــــــان

وبنات واشنطن ولندن وبكيـــــــن......... وبنت السوفيت واوربا واليابـــــــــــان

ولو اجمعوهن قدام عيني ملايين ........ ولو خيروني كلهن عندي ما لهن شان

ويجعلها تاج راصي ونور العـــــين..........اللي خذت قلبي لها القلب ولهــــــــــــان

يا سائل عن دار محبوبتي وين ............ترى وطنها موطني عز الاوطــان

وتاريخ صامد من زمان زمان .............. حفيدة عمر وشيخ الابطال

أجـــمل بـــنــات ..!! الكــــون تــلـــــــــفــــــت .. للا نــظــــار

__________ من شــــــافـــهــا غـــــصـــب(ن) علــــــيه .. احـــــترمــــها

الله ايبارك فيك زوزو كنت تعبانه شوي والنت واخد فيا حصه ههه

يسلمو شعر روعه حق والله بنت بلادك ماتلقى كيفها من اتحتفظ عليك وتحن عليك وتسترك منوره ماشاء الله

عندي عين عين ما كفت نحيب وعندي نفس مليانه هموم
زهاها غاب مطراها عطيب لها مدات ما تعرف النوم
وعندي فكر في ماضي إيجيب إيحوس سماه يملنه أغيـوم
أنسيت الود ما نبي حبيب أنا والياس مولودين توم
وفي الافراح ما عندي نصيب رفيقي ليل وأصحابي نجوم

يام العيون الحور .. نا بدوي وأنت من قضا الحضور .. بلاش م الغلا
ياسمحة التهميدة .. متخالفين رانا من أسباب عديدة .. أنت من بنات رباة عيت احميدة
ونا بدوي لا في ع البلاد اندور .. قضيت الطفولة في ظروف شديدة
ولا في شبابي شفت يوم اسرور .. شقي من خطا ليام والتعقيدة
قليل الهنا نوعا معا الفجور .. وما يهمني وانت عروس جديده
ع النوم والكساد انديرلك طرطور .. أنت خذيتي ع الحياة السعيدة
معا بوك عندك هانيه لامور .. وعنده عليك حنان وتفدفيده
اتكحي احذاه يجيبلك دكتور .. وكل عام لاثينا يشيلك بيده
في صيفها تقضي ثلاث اشهور .. دلال علمك ع الدلع والتجعيده
اللي تطلبيه اينفذه مامور .. ونا بدوي شاعث مونتي العصيده
وتمر وحليب وخبزة التنور .. بالله نين نبقوا في بلاد بعيده
وين نلقالك البيتفور .. يا دلوعه مليت م الخداع ومن مرار اللوعة
غلاك مفروض ينتهى قبل اسبوعه .. وانكان هو طول علي ايجور
وان دامن اقسامي ف الغلا طبوعة .. بعد ايام تلقيني بروفسور
واندرس علي طلاب في ميضوعة* .. واندير معهد عالي للبكا مشهور

نزعل ونرضى إيحن قلبي ليهم
بلا رادتي نرمي الزعل وانجيهم

ساعات نملى يدّي
وساعات نزعل لين نوصل حدي
انداري الزعل في خاطري وانعدي
ويغلب القلب الشوق ويناديهم
ونبقى إفـ حيرتي بين جزري ومـدي
وموجي يتكسر في حضن شاطيهم
بعد حيرتي نقربهـم
وقبل السلام بنظرتي نعاتبهم
ينادوا بحنان بلهفتي نجاوبهم
وبالحضن ناخذهم إن مدوا إيديهم
غوالي عليا وخاطري شاربهم
انموت بالعطش إن كان ما نرويهم

نزعل ونرضى إيحن قلبي ليهم
بلا رادتي نرمي الزعل وانجيهم

رائع يا مهندسة
كلام رائع استمري

جفل نومها

جفل نومها وقتا خطر مشكاها
بقيت اذرف دمعها وكساها

وقتا خطر غاليها

سال دمعها ما با النوم يجيها
عيني على منا عزيز عليها
دوم ذارفة والعقل ما هناها
وما تهنت ساعة
والعقل منها كاترات اوجاعا
نار المحبة ساكنة ولاعة
مسكين من ذايق لهيب ضناها
مسكين من لاعاته
ومظلوم من نار الغلاسكناته
تخليه صايف دوم طول حياته
ناري على اللي يذوقها وياطاها
نا ننصح المتسبب
اللي في الغلا يريد حصته مترقب
نار المحبة موش غير اتعذب
قليلة نجاتا كل من ينواها
سريب الغلا شقاني
كلام صدق ماهوش لقاني
على اللي شقي بالحب راه ياعني
صغي وذل ومعيشة قليل هناها

ماشاء الله ابداع ابداع متاااااااااابعه

عاتب عليك وخاطري واجعني
لمن نشتكي غيرك ومن يسمعني

تبعد عني
نبقى انموج خاطرى شاغلنى
بين حيرتي و خوفي عليك وظني
وكني سهيت الشوق ما يطاوعني

نا اللي جيتك
ودورت واجد بينهم ما القيتك
كان الجفاء والبعد جا فى نيتك
حقى عليك إن كان ما تودعني

توجّع فيا
وترمي ملامك يا العزيز عليا
وصابر على جرحك وما بيديا
غير الرجا كان الرجا ينفعني

لمن نشتكي غيرك ومن يسمعني
عاتب عليك وخاطري واجعني

للشاعر محمد اميمة

سلامي عليكم والسلام هديه .......ياغصرت الي على الحباره حام.
يابو شفاه امعورجا ونقيه........... يابوغثيث اتقول ريش نعام.
على مادريت العقل فيه اخلويه...... ماباعلينا بالخطاء يلتام.
ولابا يبردها سقوع اميه ..............ولابا يطفيها بطا الايام.

مشكورات المهندسة وسناء على اثراء الموضوع ابيات رائعة منكن

ماشاء الله
الشعر الشعبي الليبي فيه حكمة رهيبة
وهو من اكثر الفنون التي برع فيها الليبين

» موسوعة الفتاوى متجدد
» **مهرجان كابــاو للزي الشعبي .. Kabaw **
» سلسلة احاديث مشروحة متجدد
» فـائدة اليوم؛؛؛موضوع متجدد
» ساعدوني اللي عندها خبرة بالطب الشعبي