انتي منقبة؟....خشي وشاركي معاي

تذكير بمساهمة فاتح الموضوع :

سؤالي لكل الاخوات اللي لابسات النقاب هل كنت يوما ما مستهدفة من الاجهزة الامنية؟ من الوسط اللي عايشة فيه اهللك جيرانك، صديقاتك؟ من عامة الناس في الاماكن العامة ؟ هل صار معاك موقف محرج بسبب نقابك خلاك تفكري تنزعيه؟ انا لبست النقاب من حوالي سنتين ولكن لقيت معارضة بداية من امي اللي قالت اني بنقطع قسمي فوق ماهو منقطع باعتباري مغطية وجهي منين بيشوفني ولد الحلال باش يخطبني ومن الامن اللي طلبوا مني وبشكل ودي ولطيف انحي النقاب بأعتباره ظاهرة غير مرحب بيها من قبلهم في المجتمع ومعتبرينه نوع من التبعية لمجتمعات بعينها متهمة بالمغالاة والتطرف وقالوا لي الحجاب خيره من شن يشكي لين لابسة النقاب. ومن اقاربي اللي شافوا فيه تطرف ومغالاة في الدين من بعض العامة التافهين اللي يشوفوا في المنتقبة وحدة طالعة تشوف صاحبها ولابسة هالنقاب لاخفاء شخصيتها والصورة االنمطية للنقاب في مجتمعنا الليبي انك تكوني متزوجة وزهدتي في حياتك بالعامية (ادينتي) او راجلك هو اللي فرض عليك النقاب او اقنعك بيه لأنه متدين او حزار. انما منقبة ومش متزوجة فهذه صعبة عليهم واول ما يعرفوا يقولولك ليش؟ ليش متنقبة وانتي ما زال ما تزوجتي؟ يعني الراجل ما بيجيبه الا وجهك ! منطق مغلوط لكنه واقع للأسف 90% من الشباب لما بتزوج يتبع عينه وحطي على جهة بنات العيلات المحترمة المتدينات الفالحات هذه كلها مواصفات ثانوية وهامشية في الزواج. انا صارت لي مواقف بايخة وسخيفة بسبب لبسي للنقاب خلتني للأسف نتخلى على ارتدائه في بعض الاماكن منعا للشبهات اللي طالتني وحتى يصبح النقاب امراً مرحب به من الجميع وظاهرة تستحق الاحترام وحتى لا تستغل بعض الاخوات ربي يهديهن النقاب في امور غير اخلاقية سأظل نصف منتقبة وان كنت لا اعلم الحكم الشرعي في ذلك الا اني استندت الى القاعدة الشرعية القائلة ( درء المفاسد مقدم على جلب المصالح) شاركوني تجاربكم في هالموضوع وارأكم بكل صراحة في اللي كتبته.

ام محمد الف شكر ربي يثبتني واياك على العمل الصالح .

أم محمد بارك الله فيكي اختي كلامك يدخل القلب والله وهدوءك النفسي والرضا واضح من كلامك وحروفك ربنا يسعدك دنيا وآخرة وكل من التحق بها المنتدى آمين

زينه توكلي على الله والأخت ام محمد طرحت قضية هامة في نظري وهي خروج المرأة مع محرم, وطبعا مستحيل نلاقي وحدة مع زوجها أو أخوها أو أبوها طالعة على مكان وتتعرض لمضايقة مهينة مستحيل......

ام الحلوين يا حلوة انتي كلامك اوحى لي بفكرة jhbj

عالمشاركة في الموضوع .تأخرت في التعقيب على كلامك توني شفت مشاركتك اسفة اختي.

يازينة انتي تلبسي النقاب اللي يبين العينين أو الخمار اللي يغطي كله؟
بصراحة صار عندي لبس حاليا........

انا نلبس خمار اللي يغطي الوجه كامل ولكن للأمانة اذا دخلت محل بنشري شي ونبي نفحصه نرفع الطبقة الثانية اللي تكشف العيون باش نشبح زين وبعدين نردها . بس مشواري الاخير هذا لبسته نقاب لأن الطبقة الثانية كلاها المكوى بتقوليلي ليش ما شريتي غيره ؟ نقولك انا ما نلبس الا الاصلي وارد السعودية او الامارات اللي يكون خامة كويسة وطويل وعريض وهذا غير موجود هنا الا بطلبية خاصة ووصيت وما زال ما وصلني بس انا حتى لما بينت عويناتي ما فيهن اي مكياج هم اللي يسبلوا.

ربى يحفظك يازينة والله قريت كل ردوردك وردود الاخوات ربى يحفظكم ويحفظ الحجاب المسلمة والخمار
وانا نتمنى والله اليوم قبل بكرا نلبس الخمار
لكن الله غالب صعب جدا
انتي منقبة؟....خشي وشاركي معاي - صفحة 2 223946

انتي منقبة؟....خشي وشاركي معاي - صفحة 2 223946

هههههههههه والله ضحكتيني يا زينه مع ان الموضوع جاد

بصراحة وبدك الحق أنا خاطري ألبس النقاب, وماعنديش مشكلة في كلام حد أو اامعاكسات لني لما أطلع بطلع مع زوجي دايما ولو طلعت مشوار قريب وهذا نادرا بطلع مع ابني اللي في الاعدادي ربي يخليه الي, مشكلتي عارفة أنه ابني الصغير مش حيخليه على وجهي وأنا حاملاه ههههه يعني حتصير فضيحة في الشارع بعدين قدام خلق الله

حاليا خليني هيك أستر هههههه

بارك الله فيك يا وخيتى مها وهذا من ذوقك وحسن خلقك وربى يحفظك ويسخرلك كل ما فيه سعادتك ووليدك الصغير الله يحفظه فكرنى بولدى وكان عمره 3 سنوات لما البست الخمار وانجى بنطلع نسأله اما احسن ماما هكى ولا بالحجاب يقولى لا غطى وجهك احسن انقول سبحان الله يولد الانسان على الفطرة ربى يقدرنا على طاعته ويسعدنا جميعا فى الدنيا والآخرة اللهم آمين

هذه يا زينة ويا أخواتى محاضرة اعجبتنى كثيرا وأسأل الله ان تفيدكن كما أفادتنى
محاضره رائعه للشيخ مسعد انور بعنوان فصل الخطاب فى حكم النقاب

للاستماع والتحميل ارجو نسخ الرابط ثم وضعه فى البحث فى صفحة قوقل ان لم يطلع على طول

http://www.islamway.com/?iw_s=Lesson...esson_id=54788

حبيباتي مها وام الشيماء شكرا لحضوركن الدائم اثلجتن صدري.صديقتي الجديدة ام محمد شكرا على االمشاركة ولافادة بارك الله فيكن.