في وحدة عندها عزوزة زي عزوزتي

السلام عليكم
والله سؤال ليا من اول مااتزوجت اندورر في اجابة عليه
هو انني متزوجة من مدة والحمد لله وعندي زوز صغار وراجلي يخدم في الصحراء وتوا
معاش يقدر يقعد بعيد على صغاره وقرر ياخدنا معاه لكن عزوزتي الله اسامحها اعترضت
وهي معاش اتكلم فينا حتى صغاري معاش اتمس فيهم بعدر اننا نبو انحولو لاننا معاش انحبوهم والكلام هدا مهاناش
ونبي نعرف هي من حقها تحرمني وصغاري من بوهم وانها عندها الحق انها تمنعني من السفر والقعدة بححدا راجلي مع العلم ان حاول اكتر من مرة احول لطرابلس لكن ماحصلش

أختي الحبيبة تسنيم

للإجابة على سؤالك لابد من معرفة عدة امور أولها هل إذا غادرتم للصحراء ستبقى عزوزتك لوحدها؟لأنه ما ينفع تبقى لوحدها, وهي امراة كبيرة وعندها ابن, صح؟

هل حاول زوجك يقنعها وهو معها لوحدهما يعني ما تكوني معاهم أفضل, لكي تأخذ راحتها....وزوجك ياخذ راحته ويعبرلها عن حاجته انك تكوني جنبه واطفاله أيضا....

طيب وفي الآخر هل في الامكان توخدوها معكم للصحراء كآخر حل, ما بعرف ما هي ظروفكم أختي ولكن ثقي وتأكدي ان رضا الله من رضا الوالدين وحاولي تكلميها بلين وما تغيري معاملتك معها أبدا حتى بالنظرة لنها الفترة هادي أكيد حساسة جدا وخاصة لو ما عندها غيره أولاد, ودايما تقربي لها وخلي أولادك يبوسوها دايما ويقعدوا معها وأكليها حتى من يدك المهم ترضى عليكم لأن لو لا قدر الله غضبت الأم على ابنها ربنا أبدا ما يوفقه في الدنيا والعياذ بالله..ز وصدقيني لما تحطوا في بالكم رضاها الله من عنده حيحل المشكلة لكم ان شاء الله,,, انتظر منك رد

السلام عليكم
بارك الله فيك اوخيتي على ردك
والله من مدة اندور في حد ارد عليا بعقلانية
وخليني انهدرزلك شوية تفاصيل على موضوعي
الحق عزوزتي مش كبيرة هلبا تقدري اتقولي بنهاية الاربعينات وشيبانيا حي والحمد لله وهو يخدم مدرس بمعنى انه عنده خدمتها ودوام يومي يمشيله وعندي مشاء الله زوز اسلاف شباب ولكن ماعنديش احموات
والحمد لله راجلي اعيي وهو اقنع في امه من اول ماتزوجنا حتى انه دايما اكلم فيها ابروحه واعيي وهو اقنع فيها وكلموها حتى اسلافي وشيبانيا لكن ماصار شئ وهي امدايرتلي الحق حرب نفسية كأني امدايرة العيب وكل مانخش لحوشها تطلع منه وماتردش عليا لما انكلمها ورغم هدا ماحولتش انغير معاملتي معاها لكن والله نفسيتي تعبت والي زاد راجلي ارجع للصحراء ومش عارفة كيف بندير ومش عارفة وعلاش رغم انها حتى هي عاشت حياتها الزوجية طبيعي وعلاش تبي تحرمني من حقي
وهى ماتقدرش ناخدوها معانا لاني زي ماقلتلك عندها شيباني يخدم وزوز اسلاف
والمشكلة انها ديمة اتقولي انتي جيتي ليا اني مش تمشي مع راجلك
بالله عليك بعد هدا شني تبي اكتر لو كلامي فيه غلط او ان طلبي في حقي خطأ بالله عليك ردي عليا لاني بجد الموضوع امشوش علينا حياتنا
وبارك الله فيكم على المنتدى الحلو والوحيد الي القيت حد اسمعني وافهم مشكلتي

السلام عليكم اختى تسنيم
ربى يخليلك راجلك وصغويرتك واكيد ربى يخليلك عزوزتك

انا سألت عزوزتى هى كانت جنبى لما انا فتحت المنتدى قالت لى مش من حقها انها تحرمك من راجلك

انك تسافرى معاه ويقعد مع مرته وصغاره

لكن كيف ماقالت لك الاخت مها

حااااااااااااولى اكثر من مرة انك تكلمى معاها باللين وتخلى صغارك يقعدو معها اطول وقت وحاولى انك تكلمى شيبانيك يكلمها

وان شاء الله نسمع عليك اخبار احلى
والباين انك زوجة متفاهمة

ورضا الله من رضا الوالدين

هل هى لها سبب مقنع انك تقعدى وماتمشيش معاه

وممكن هى تبيك تقعدى معاها حتى راجلك ميطولش فى الصحراء ويقعد ديما يجى لو انت سافرتى معاه ممكن هى تفكر
انه يطول حتى يرجع

وهى مسكينة تلقيها تفكر فى ولدها وتتمنى يكون قدامها على طول

الله غالب

لكن لازم تتمسكى اكثر فى الموضوع مع زوجك وشيبانيك

والسلام عليكم

السلام عليكم ورحمة الله وبركاته شوفى يأختى تسنيم انت عندك الحق فى انك ما تبعديش على زوجك وهذا فى نظرى هو الصح ولكن ( العزيزة) الله يهديها ويسامحها ما تبيش على خاطر خدت عليك وعلى الصغار انت تقربى ليها اكثر بالمعاملة الطيبة نحى من بالك انها المفروض تكون تعاملك بالمثل يعنى لما تمشيلها خلى روحك عادية جدا وارفعيلها حاجة تحبها وخلى موضوع سفرك مع زوجك خاص بيكم هو الراجل وهو اللى يقرر بالك انت لما تسافرى تتصلى بيها بالنت حتى كل يوم وترضى وبالك تفكر تزوج ولادها الزوز ويخف عليك الحمل المهم تكونى بالك واااااااااااااااااسع وعامليها بحب وشفقة لانها الباين غايرة مع ان حناى الله يرحمها ويغفرلها تقولى يا بنتى ما دام شابنيك حى عزوزتك كأنها سلفتك يعنى عندها ما شاغلها وربى يهدينا ويهديها وما تنسيش الدعاء وخاصة فى جوف الليل باش ربى يسهل اموركم ويسعدكم طمنينا عليك

وللهى عندك حق وانا حاسة بيك انا راجلى يخدم فى الصحراء واصعب حاجة لم يمشى انحس روحى مضايق رغم انحاول نشغل نفسى هده ومازال لم ايجو الصغار مش عارف كيف ايصير مع العلم انى مشيت معه لى الصحراء فى بدايه الزواج وعجبنى الجو هلبه لكن الله غالب روحت ننصحك عمرك ما تتخلى على قرارك هده لزم اتكونى بحد زوجك وضغارك والعزوز فى الاخير لزم تقتنع لانه مش حتقدر تنحرم من صغار ولده وتحمله هى فى النهاية زى امك

السلام عليكم
بارك الله فيك أختي ام الشيماء وحتى انتي ربي اخليك عيلتك واعزوزتك
حبيبتي ليا 4 سنين متزوجة وياناري راجلي كل سنة اقدم طلب انتقالة ومااوفقوش عليه وهو ماشاء الله منصبه كويس غادي ولو وافقو على انتقالته تعبه كله يمشي وعلى كلام راجلي ان عزوزتي معترضة لانها ماعندهاش بنية لكن شني دنب صغاري يكبرو وبوهم بعيد عليهم وهما توا كبرو وابدو يفهمو شني معنى سفر بوهم وقعدته بعيد عليهم والحق الموضوع خليته بيد راجلي ماادخلتش فيه لانه يعرف اسلوب التعامل مع امه ولو على شيبانيا هو مش معارض وهو ياناري من غير مانطلب بروحه اكلم فيها لكن هي امسكرة راسها
باهي شني فيها نتوكلو وانسافرو والموضوع متأجل ليه4 سنين على خاطرها واكيد لما تلقا راجلي متريح واصغاره بحداه اكيد تقتنع لانه معقولة فيه ام ترضى البهدلة لولدها وانه محروم هكي والله حتى امي عندها كنة لكن مادرتش الي دراته اعزوزتي وهي فرحانة لان خوي اخدي معاه امراته معاه وهدا احرف وهو يسكن في الخارج
ولو على المرواح اكيد بنقعدو زي ماكان اروح شهر بشهر لانه حتى اني نبي نستاحش اماليا
وانتم شني رايكم

بارك الله فيكم اوخياتي على ردكم
وخاصة د0 مودة لانه حسيتي بيا بجد لانك عايشة زي وضعي

كلامك مقنع وصح ولله انا حاسة بى البعد وحتى راجلى قال نفس كلام راجلك ان لو حاصل لزم من الانتقال حايخسر هلبه ميزات فى منصبه لكن لزم من التضحية

لا تعليق

[ندعوك للتسجيل في المنتدى أو التعريف بنفسك لمعاينة هذا الرابط]

الله يكتب لكم اللي فيه الخير

أختي تسنيم

بارك الله فيكي واضح أنه عزوزتك تحب جلوسك معهم في البيت لأنه ما عندها بنات, وتعتبرك زي بنتها وأيضا أنا من رأي أم الشيماء
يمكن عزوزتك تفضل بقائك عندهم لأنه بهذه الطريقة تضمن عودة ابنها كل شهر وتراه من جديد, وهي تفكر لو سافرتم مع بعض فإن
زياراتكم سوف تقل , انا أؤكد على حقك في أنا تكوني مع زوجك أنت والأطفال, ولكن حاولي بقدر المستطاع أنت وزوجك ان يكون
بطريقة ما فيها خلاف مع أم زوجك, الجألي للدعاء لله أن يقرب البعيد ويجد لك الله الحل المناسب, وخلي زوجك يكلمها عن شوقه
لأولاده وأنه محتاجك معه بقربه وأنه تزوج لتكون أسرته بقربه دوما, ولو أخوة زوجك احدهما في سن الزواج اقنعوه بالزواج فتحل مشكلتك هههههههه عموما أول كنه دائما تحظى بأكبر قدر من الاهتمام والحب والفرح وأيضا لها نصيبها من المسؤولية والمسائل هذه التي في ظاهرها تكون من المنغصات ولكن تذكري دوما أنك ستبقين زوجة ابنهم البكر ولك مكانتك في عائلتهم وطالما عزوزتك ما زالت صغيرة حاولوا تكلموا عندها حس المنطق برغبتك في التواجد بقرب زوجك من مرأة لمرأة بينك وبينها يعني وأخبريها أن هذا نفس شعور زوجك , لأنها حاليا لا تستطيع ان تتخلى عن وجودكم بقربها وخاصة اطفالك اللذين ملؤوا بيتهم ضحكات ومرح ربنا يخليهم لك, ولو استلزم الأمر أن تغادروا مع عدم رضاها خلي زوجك وأبوه معه وأخوته يكلموها بشكل نهائي ويطلب رضاها ويقول انه اتخذ
قراره ولكن رضاها مهم ليوفقه الله في حياته وأنه سيبقى على نفس النظام القديم في العودة كل شهر,,, ويقبل يديها ولو لزم أرجلها لأنها أمه وما يهون عليها
عذابه هي فقط تمر بمرحلة تخاف أن تفقد ابنها وأحفادها اللي تعودت عليهم وممكن نجدلها العذر , المهم ستكون الفترة الأولى من السفر صعبة وستسمعين كلام جارح احتمال ولكن بصبرك وطلبك لرضا الله أولا وعدم تغييرك لمعاملتك بل بجعل معاملتك أحسن حتى ستمشي الأمور أحسن مما توقعتي بإذن الله.....

وأنا حاسة بيكي والله يا أختي ليس لأن زوجي بعيد عني أبدا ولكن متخيلة معاناتك لكن خلي رضا الله أمام عينيك وربنا سييسر لك أمورك

الاخوات كفو ووفو

والله كلا م الاخوات ما شاء الله لكن انتي شن تبي تقعدي مع عزوزتك ولا راجلك
وصغارك [ندعوك للتسجيل في المنتدى أو التعريف بنفسك لمعاينة هذه الصورة] وزي ما قالت مها
خلي زوجك يكلمها
وان شاء الله ربي يهديها
واني نصحك انك تمشي مع راجلك [ندعوك للتسجيل في المنتدى أو التعريف بنفسك لمعاينة هذه الصورة]

السلام عليكم اوخياتي
والله بجد بارك الله فيكم على الرد والله اطمن قلبي توا لاني القيت الرد على سؤالي بس ادعو معاي ربي اسهل علينا الموضوع
والحمد لله توا اعزوزتي رجعت زي قبل اتكلم فيا واتهدرز معاي ولا كأن صار شئ او انها كانت مقاطعتني ولتوا مش فاهمة خيرها او ممكن فهمتنا وفهمت رغبتنا في اننا نبو انكونو مع بعض وانها الحمد لله القيتني زي ماكنت ماحولتش انغير من معاملتي معاها وحتى صغاري قعدو زي قبل ماحولتش انخليهم يكرهو جداهم لاتوا ولا قبل
بس حبيت انرد على ام صهيب طبعا انحب انكون مع راجلي وهو اني وعلاش اخديت رايكم لولا انني نبي انكون بحداه والله البعد يحرق وان شاء الله ربي اصبرني الايام هادي واسهل الصعب

ما شاء الله يا تسنيم

الأوضاع في تحسن مستمر الظاهر والفرج قريب

شوفي بالنسبة لتغير حماتك أم زوجك المفاجئ هادي ستبقى سر من أسرار الحموات هههههههههه وأحسن شي إنك ما غيرتي معاملتك وبقيتي متفهمة لموقفها لأنك لو كنت تغيرتي وعاملتيها بطريقة سيئة لن يكون هناك ملام غيرك في الموضوع, ورجوعها عن موقفها يدل انها أدركت انك لابد أن تكوني مع زوجك وان الجميع يوافقونك وزوجك الرأي ووجدت انها الوحيدة المعارضة, الحمد لله على التطورات الايجابية, وبشرينا عندما تلحقي بزوجك

بارك الله فيك يا اخت مها بس بجديات اقعدلي سر امحيرني وان شاءالله زي ماقلتي اتكون اقتنعت

أختي تسنيم لقد نقلت موضوعك لقسم الحياة الزوجية لتعم الفائدة أكتر ويكون مثل المرجع لكل عضوة جديدة أو معنا من مدة ان حبت أن تستفيد من تجربتك, بارك الله فيكي وزي ما قلتلك سيبقى سر ولا تشغلي بالك فيه المهم اسعدي بالنتائج........

السلام عليكم اوخياتي
بارك الله فيكم اوخياتي على ردودك الراقية في اسلوبها وحلاوة كلامكم والحمد لله انني القيت اوخيات زييكم ردو عليا وطمنوني
والحمد لله راجلي زاد كلم عزوزتي وماطلعش من بحداها حتى اقتنعت)طبعا بعد نقاش دام لمدة ساعتين اتخيلو حرق الاعصاب)
بس الحمد لله واخيرا قالت برو ربي يفتح عليكم واسهل عليكم واسهل عليا غيابكم وغياب الصغار وان شاء الله غدوة نبي انسافر معاه
والحمد لله بعد 4سنين اتحقق حلمي في العيش زي اي وحدة متزوجة بحدا راجلها
وان شاء الله نتحمل فرقة امي وبوي واوخياتي الغاليات عليا لانني بجد اتعودت على اللمة معاهم كل خميس وجمعة في حوش بوي وحلاوة اللمة معاهم والضحك
وان شاء الله نقدر نتحمل الفرقة والغربة بروحي وانكون خير انيس لراجلي في غربته
وبارك الله فيك ياام الشيماء على المنتدى الرائع رغم انني كنت مش من الدائمين عليه بس الوحيد الي القيت فيه اوخيات اسلوبهم حلو وكلامهم رزين وموزون ومنتدى راقي واكتر من رائع واهبل وان شاء الله نقدر نتواصل معاكم اكتر من اني انكون وحدة القت صدر احنين تشكيله
وانعادو وانقوللكم بوركتم خير اخوات وخير منتدى وخير مشرفات
السلام عليكم ::

الله معاك
والغربة يااختى ماتبيلها الا الصبر والدعاء وكل شئ باجره ان شاء الله
وربى يسعدك وان شاء الله
ورحلة موفقة باذن الله

[ندعوك للتسجيل في المنتدى أو التعريف بنفسك لمعاينة هذه الصورة]

ربي يكون في عونك اختي

انا شاء الله ربي يوقك اختي