هيا يا حلوة فيدي واستفيدي

بسم الله: حبيباتي شفت في المنتديات حاجة عجبتني وياريت لو يكون منها في منتدانا هذا نفيدوا بعضنا فيما يتعلق بالمكياج والعطور وجميع مستحضرات العناية الشخصية كيف؟ نقولوا لبعضنا عن الماركات الموجودة في السوق الليبي واسعارها واماكن بيعها واللي ليها تجربة ناجحة مع ماركة معينة وشافتها تناسب جونا وتمشي مع ذوقنا الليبي راهو كل بلاد لها ذوق معين في الوان وحطة المكياج وحتى انواع العطور شن هي الاحلى من واقع تجربتكن الشخصية واللي يناسب العرايس تحديداً يعني من الاخير نبوا دليل للتسوق الوحدة كان ناوية تجهز لعرس او تجدد في مظهرها تكون عارفة شن الموجود في السوق ووين تلاقيه بالظبط وشن الاسعار ياريت خواتنا في طرابلس وبنغازي ما يبخلوا علينا بأعتبار فيهن كل جديد و متابعين للموضة في كل شي هيا يا حلوات تفاعلن معانا. وعشان ننشط الموضوع عندي سؤال اللي تعرف تجاوبني ولها الشكر مقدما عطر( تريزور) وين نلقاه في بنغازي وبكم سعره؟

دائما تتحفينا بالجديد
لى عودة


مع الروائح والكريمات
مش المكياج لانى منحباش هههههههههههههههه

فكرة ممتازة

شكراً للحلوات اللي عقبن على الموضوع ومستنية المشاركة الفعالة من الكل وانتن اولهن وكل سنة وكل شهر وكل يوم واحنا حلوين وزي العسل!

هذه هى اللى نستعمل فيها ونمووووووت فى ريحتها تعدم






على العموم انا ديما نشرى من هذا المحل فى هولندا

http://www.yves-rocher.nl/control/main

واسعاره فى متناول الجميع
واحلى شئ فيه انه كل المكياج والروائح مافيهاش مواد كيماوية اغلب الاشياء اللى فيه بالاعشاب


زينة الموضوع هذا منزله منه براءة 2004 شبيه بهذا الموضوع

لتعم الفائدة للجميع
https://alshaima.yoo7.com/montada-f9/

موضوع جميل يازينة لكن بصراحة انا لا أستعمل الكثير من مستحضرات التجميل وغالبا ألجأ للطبيعه ههههههههههه لكن أستخدم كريم مرطب غالبا, زي نيفيا أو دوف وكريم الأساس أفضل ماكس فاكتور وأفضل مسكرا استخدمتها كانت نيفيا وفيها رأسين واحد للطول والتاني للكثافة, وكانت أفضل من اكس اكس إل بكثير الصراحة, أما الآي شادو حاليا عندي نوع مكياجي ممتاز, وأستخدم غاليا روج بلون الشفايف ونادرا كمان والكحل طبيعي من زيت الزيتون او اللبان المر وأحيانا أضع قلم كحل عادي, أتمنى أكون أفدتك ولو بشئ بسيط

أنا عطري المفضل هوة Chic





الكحل المفضل هو لrevelon





أما الكريم الذي استعمله هو

موضوع حلوا لى عودة

برافو ام الشيماء ،ام نبراس عندي فضول تجاه عطرك حاساته شيك زي اسمه ،مها بس حبيبتي كيف تكحلي بيهن الزيت واللوبان اول مرة نسمع بيهن

نسيت نوضحلك يا ام الشيماء والكل انا موضوعي خاص بالتسوق بالدرجة الاولى يعني مش بس نعرفوا مستحضرات .....لا... نبوا مكانها واسعارها وهذا الفرق بيني وبين موضوع براءة الشريرة! كتبتلها قصة حياتي مع المستحضرات التجميلية وما عدلت علي بكل انا زعلانة منها!هيه راني نبصر ما تصدقوا.... براءة بريئة ونحبها!

هههههههههههه براءة اصلا الكل متحلف فيها خلتنا معلقين فى المنتدى وعادش خشت
هههههههههههههههههههه

معندهاش موعد

كان على عطرى هو يهبل ريحته واحلى شئ انه خفيف
وسعره بالدينار تقريبا 40 دينار وبس
والكحل اللى نستعمل فيه ممكن 5 دينار رخيص هههههههههههههه
لكن احلى شئ فيه هذا المحل كيف ماقلت لك كله بالاعشاب مافيشى ضرر والله اعلم وام نبراس تعرفه مية فى المية
وهذا المحل موجود فى تونس انا مشيت لتونس وشوفته فى سوق اسمه تونس ستى واسعاره ارخص من اوروبا
وناخد منه فى المزيل العرق نفس الماركة الريحة

ياريت كنت نعرف هالمعلومة قبل يا ام الشيماء مشيت لتونس 4 مرات وما ريت غير المصحات والمطاعم قهرة عليا عن الكذب مرة خوي حن عليا ودخلني سوق شعبي زي المدينة القديمة(الحارة) كان مشيت لتونس مرة اخرى بنمشي لها المحل ونشوف.ايوا هكي نبيها المشاركات

زينه كحل الزيت يصنع من زيت الزيتون بعد ان يوضع به قطن ويشعل زي الفتيل ويبقى مشتعل بسبب الزيت ويخرج لفوق زي الدخنة السودة ويكون هناك سطح معدني تترسب عليه الدخنة السودا وبعدين تجمع على هيأة بودرة وهادي كحل زيت الزيتون بصراحة ما عملته بنفسي, لكن كحل اللبان عندي أسهل بتجيبي اللبان وتكوميه على بعص وتشعلي فيه النار وتحطي صينية فوقه ماتكون ألمنيوم ضروري, وكله شوية تشيلي الصينية وبريشة حمام توخدي الكحل اللي تجمع في ورقة وهكذا لما تخلصي الكمية اللي بدك اياها, طبعا لازم تكوني خارج البيت في الجنينة او البلكونة لأنه آثار الدخان مدمرة على السجاد هههههههه وكمان يوم ما فيه غبار أو ريح عشان ما يضيع شغلك وهذه الطريقة أعطتها لي بنت أيام الجامعه من وورفلة الله يسهل عليها اسمها وداد وقالت الكحل ممتاز للعين وتعرفي حتى ريحته حلوة,,,,, أتمنى اكون أفدتكم جميعا..

طيب الأخوات من طرابلس عندي سؤال.......

مين احسن وأرخص محل لبيع مواد التجميل في طرابلس وتكون جديدة ونوعيات كويسة أصلية؟