بصراحة ومن الاخير

تذكير بمساهمة فاتح الموضوع :

انا اليوم الصراحة معاي مقطعة بعضها بنتكلم بصراحة وربي يستر موضوعي عن الزواج المعروف ان الولد هو اللي يخطب لنفسه او اهله يخطبوله ولكن هل نتقبلوا فكرة ان البنت تخطب لنفسها او اهلها يخطبولها! الاجابة غالبا لا..ليه؟ خوذوني مثال انا ما لقيت عريس على المواصفات القياسية اللي في بالي لا قبل لما كانت افكاري سطحية متعلقة بالمستوى المادي والشكل بالدرجة الاولى ولا توا لما عقلت ورزنت وصار الاهم عندي الخلق والدين كل اللي خطبوني وهم للأمانة قلة ولله الحمد ما طابقوا المواصفات اللي نبيها فقلت في بالي بما انك توا اكثر تدين والتزام من قبل ولله الحمد ليه ما تدوري على عريس بروحك او تشحتيه قصدي تطلبي من حد يرودلك عريس بالمواصفات اللي تبيها ولأني في الحقيقة خجولة اكثر ما تتخيلوا كان صعب اني نصرح بأفكاري هذه بشكل مباشر فكنت في كل لمة لهلي او الجيران والحبايب نطرح موضوع الزواج ونقول من جملة كلامي بعدما نمدح في روحي ونشكر عليها ! اني ما نبي نخش في موال العلاقات وقصص الحب والغرام والنصيب ما جاش لغاية تو واللي عندها عريس يسوى تجيبه وبأسلوب كوميدي باش اللي عنده في خاطره شي تجاهي يشوف في كلامي بارقة امل ويشجع واللي رافض الفكرة يقول هادي تبصر مش جديات يعني في الحالتين ماني خسرانة شي بس للأسف ما نفع قولتكن الوحدة زيي تطلب عريس بالعين الصاحة!!!!!! والا كيفما صبرت قبل تكمل والله الرحمن المستعان؟ والا تحط الدين غلى جنب وتجرب كم علاقة لعل وحدة منها تنتهي نهاية سعيدة وتبرر لنفسها بها الكم مقولة (انما الاعمال بالنيات ،والعبرة بالنهايات، والوقت هكي يبي )ومن هالامور.

تسلمي حبيبتي مها وشوفي النصيب سبحان الله في ناس سمعت بيهم ليلة العرس مايصيرش والحمد لله على كل حال

الزواج قسمة ونصيب وزى ما قالت سناء نصيب حد ما ياخده حد ويا زينة ويا سناء ما شاء الله عليكم توة أمثالكم قليل ربى يكثر من أمثالكم وانى هذا علاش نحس ان ربى حيعوضكم خير وديما انقول مش المهم الوحدة تتزوج بس الاهم من ذلك انها تختار صح وتعيش صح وما فيش زى الإختيار اللى اساسه الدين ربى يرزقما ويرزق كل بنية الزوج الصالح ووالله خطرت علية فكرة علاش ما نساعدوش بعض يعنى اللى تعرف إنسان كويس ويدور فى إنسانة كويسة تدله عليها وتكون من عضوات المنتدى وعبر الرسائل الخاصة ولا شنو رايكم ويا سعد من كان سبب فى اجتماع اثنين بالحلال وربى يسهل ويسعد الجميع اللهم آمين

فكرة حلوة يا ام محمد فتح الله عليك

ومن كان في حاجة اخيه كان الله في حاجته

جزاك الله خيرا على هذه الفكرة

الحياة هذي قسمة ونصيب والانسان لازم يكون شكور لفضل الله عليه اولا واخيرا مرات ايطيحك ربي في واحد مايعرف ربي

ويبهدلك وتقولي ياريت قعدت في حوش هلي افضلي

انا نشوف في وحدات ماازوجت لعند خلاص وبعد تزوج تتبهدل بشكل مش عادي

لما انشوفهن انقول ربي يكون في عونهن انا سبب تعاستي الغربة عن اهلي وهي سبب تعاستها غربتها ع شريك فراشها

نقول سبحان الله الانسان احيانا ايكون سبب في تعاسة نفسه

ام محمد ياعسولة فكرتك حلوة اتهبل وانا بصراحة نايدك فيها ومعاك وانا من طرفي حتعاون معاكم لما تقتضي الحاجة

واللي عندها حد علي وجه زواج تعلن عليه والبنيات واجدات سواء بنات المنتدي او قريبات الاخوات

وربي يوفقكم

ماشاء الله عليكن اخواتي

قال تعالى في محكم التنزيل"(( وتعاونوا على البر والتقوى ولا تعاونوا على الاثم والعدوان))

بارك الله فيك اختى ام محمد على كلامك الطيب وبارك الله فيكم اخواتي على شعوركم الطيب وان شاء الله ربي يرزق كل بنت الرجل الصالح اللى يعينها على الدنيا وفتنتها

ربي يحفظكم