صداقه مسلمه ومسيحيه

هذا اول موضوع ليا معاكم هنا
هو مش موضوع موضوع قصدي نبي ناخد ريايكم وتشاركوني الري
انا والعياد من كلمه انا عايشه برا وماعنديش هنا صحبات بكل بكل حالي يسخف




المهم ومعرفتش ولا وحده عربيه
مرات نقول نقعد هكي خير اريح واقل مشاكل لكن مرات نقول لازم تكون عندي صاحبه الغربه مرة ومرات الواحد يستحق لحد يشكيله ويحكيله هم لو متضايق
مع انه والله زوجي مامقصر معاي
هدا شي والشي التاني ان زوجي عرفني بزوجه صاحبه هو كندي لكن زوجته عراقيه اوكي هذا اللي نلبيه ولا ؟
لالا مش هذا


ماهو شني هذه مسيحيه مش مسلمه
هنا المشكله والله هي ديما تجيني وتتصل بيا ولما تعبت جتني في المستشفى وطيبتلي بردوا وغيره
لكن في شي في نفسي مش مرتاحتلها خاصه لما نتناقشوا على الدين
وكلامها اني المفروض نحول الحجاب والانسان بالجوهر مش الظاهر وغيره
ولا لما تقولي ليش بس تاكلي لحم الحلال ماهو كله لحم المهم قبل ماتاكلي تصلي
وكله م عند ربي
صعب تقنعيها وصعب النقاش معاها مرات نسكت ومعاش اناقش مش لاني ماعنديش الحجه لكن ماخاطريش نشيط ريقي
ونخش في نقاش عقيم وخاصه هي متزمته بارتئها هلبه
قررت اني معاش نخالطها
لكن هي ادور فيا وتحسسني اني شريره لاني مش مدورتها
معرفتش هل نتقبل صداقتها ولا نفوتها وللعلم زوجها صاحب زوجي الروح بالروح وقالي مستحيل نتغير على صاحبي
ويحب ديما يمشيلهم
شن رايكم
وشن اديروا لو مكاني

اول شئ مش مشكلة مسيحية والا مسلمة بس المشكلة في انكم دخلتوا في امور الدين والناس هادم صعب يفهموا ويقتنعوا بالرغم ان مريم العذراء كانت متحجبة وركزي حتى في افلامهم عليها بس ميقتنعوش وديري بالك من جهة الاكل مرات مش حلال خلي علاقتك عادية بيها يعني سطحية ونصيحة معاش تتناقشي معاها في امور الدين اريحلك هلبا لانهم حيحطوك في مواقف محرجة طبعا مش في دينا بس اني مرة سالتني وحدة هولندية واني نوري فيها في صور عرسي خيرا صاحبتك امكيجة وتصور معاك وزوجك موجود بالرغم انها متحجبة بس ماتبيش تقتنع ان زي ماعندنا ملتزمين عندنا المقصرين في دينهم زينا زيهم لكن هي تقولك احني كلنا زي بعض منغيروش في دينا وهكذا المهم متوجعيش راسك بالنقاش خلى مواضيعكم عامة
سامحيني طولت عليك

هلا ام الحلوين بالعكس ماطولتيش ماوراي شي ههههههههه
عندك الحق في كلامك والله والله انا ديما نتجنب في النقاش معاها على الدين هي اللي تحب تتدخل
واكثر من مرة نسكت حتى اني نقول لزوجي ليش تتدخل في دينا خيرني انا عمري ماانتقدتها ولا قلتلها خيره دينكم هكي ولا هكي
ولما نسكت مرات نحس بتانيبالضمير كيف اني مادافعتش على ديننا
والله مانحب اناقشها هي ديما اللي تبدا
ومرة كنت عندها وزوجي في العمل جت هي بسيارتها خدتني عندها تعرفي حطتلي قناه مسيحيه عربيه فيها اللي يقولوله بابا شنوده يعطي في محاضره قالتلي اسمعي وناضت وخلتني مشت ادير في الشاهي
حسيتها تبي تاتر عليا والله اعلم
قلتلك حيرتني معاها
ولما معاش نكلمها تتصل بيا وتجيني وتقولي كان تبي اي مكان نرفعك
والله معاش فهمتها

لالالالالالالالالالالالا ديري بالك هي تحاول تاثر فيك يمكن زي ماقلت لكن ردي بالك منها وعندهم هلبا طرق ياثروا بيها على الناس فردي بالك وديمة تجنبيها في الدين اليوم قناة غضوا ترفعك للكنيسة هههههههههههههه (انبصر عليك) راهو النقاش معاهم زي اللي يحرث في البحر
والله والله ردي بالك ردي بالك حتى لما تبدي بروحك حاولي متفكريش في اللي قالاته لانه ولما تبدا تتكلم متركزيش على كلامها وربي يكون معاك يا رب
قال شن اللي صبرك على المر قاله اللي امر منههاربة من الوحدة طلعتلها مسيحية
واقري قران وان شاء الله تجيبي العيل اللي يلهيك وتلقي مسلمين يا رب

بارك الله فيك ام الحلوين الحلوين

ولا يهمك والله مستحيل تاثر فيا الحمد لله اللي تربيت عليه وتعلمتاه من صغري مستحيل من كان يكون يغيره في لحظه او لحظات
غير اهو زي ماقلتلك نفضفض
يقولوا فيها من الوحش اظبط جحش هههههههههههههه
بس الحق بديت نتعود اني نكون بروحي مرات اضيق بيا صح وخاصه اني كنت اجتماعيه هلبه ونحب الصاحبات والتهدريز
لكن ان شاء الله نقدر نتعود على الوضع اللي انا فيه

لا الموضوع تبيلا تربيعة سارهمو اي حد يسافر لازم يمر بيه شئ زي اللي مريتي بيه شي عادي بس
اللي مش عادي ردة فعلك لانك لما حد يحكي معاك بهالشكل تحسي كانك يهين فيك وتلقي روحك قريب تبكي

]هو نفس الشي يسير معانا وللاسف المشكلة في المسيح العرب مش في الاوروبيين لان الاوروبيين مش متعنتين بالراي

]ونبي نقولك انتي الفترة هذي لازم يكون في حد جنبك ولو حتي بالنت او التلفون لما اتكون معاك لانهم هما عندهم نقطة

]ضعف اكتشفتها واللهي واندهشت هما يخافوا من اجتماع المسلمين يعني لو مكان ايكون فيه اكثر من مسلم الشي هذا

]يكسرهم اساليني عنهم انا

]من حوالي سنة تناقشت انا وكم وحده وكنت دائما نتحاشي النقاشات هذي بس المرة هذي كان لازم اناقش

لاني بصراحة مقتنعة ان من واجبات المتغرب نشر الاسلام ولو علي قطع رقبته

]وعموما ناقشت وبصراحة عطاني ربي الادلة وطلاقة لسان هذيك الساعة وخليتهن يقتنعوا

هالفترة في وحده تسال فيا علي الاسلام وان شاءالله ربي يهديها

حجابي تمسكت بيه رغم انهن كل مايجيوني في الحوش ماشاءالله شكلك احلي من الحجاب واصغر شعرك حلو ليش
مغطيتيه باختصار انقوللهم انا مسلمة ومحجبة ومقتنعة وندمت علي اني ماتحجبتش من الطفولة

تعرفي شن رد الفعل ؟؟؟؟

الذهول ونصيموا نوافل ونفتخروا قدامهم بالاسلام ونعاملوا فيهم علي انهم اخوان لنا لدرجة انهم خلاص ياسوا

اما الاوروبيين فهما مش الكل يعرف ماهو الاسلام ؟؟؟

وبالعكس يحاولوا يعرفوا منا وخصوصا بعد يشوفوا انا نحنا مش اقل منهم

انا دائما مصرة بعد نحكي معاهم نحكي بالسويدي اضافة الي لغة القراءن

]مثلا لما تسالني كيف حالك انقول بروا الحمدلله يعني انا كويسة وبعد نتفقوا علي موعد انقول اوكي ان شاءالله

لدرجة انهم حفظوها
انا تمنيت حكيت معاك وجها لوجه لان الكتابة ماتوصلش الكلام
]اياك تلغي هويتك مثلا تعودي علي فتح القراءن وديري النت علي مواقيت الصلاة عشان يسمعوا الاذان ولما ياذن امتنعي

]علي الكلام ورددي معاه وحطي صلاية في غرفة الجلوس وايات قراءنية ومصحف حاولي تفهميها بجميع الطرق انك
مسلمة بالاقتناع مش بالوراثةودائما خلي الصلاة علي الرسول علي لسانك

اذا احترمت دينك زي مانحنا محترمينهم احترميها واذا حاولت تعوج وقفيها عند حدها واذكري هي مش اغلي من رسولنا

وانا ليا عودة والحكاية عن بعض المواقف اللي صارت معايا

سارهمو بصراحه اني مع مرمر في كل كلمه كتبتها

وبصراحه اني لو مكانك مستحيل نحتك بيها يعني زي هذه قلة الصحبه معاها افيد من قربها لو بتجي لي رايي فوتيها خير شن بديري بعلاقتك معاها

اني اول ما تجوزت سافرت لماليزيا وكان فيه واحد عراقي يقراء مع راجلي واحيانا يمشو مع بعض للجامعه وعرفني على مرته وهي......وبصراحه من اول زياره جتني فيها ما ارتاحتلهاش ومن حكيها عرفة ان نظام حياتها مايمشيش معاي ومنها على طوووووول هي في حالها واني في حالي اتصلت بيا اكثر من مره وبعدين ايست

وان شاء الله ربي يوفقك للي فيه الخير دائما والله فعلا الوحده صعبه

صح كلامك والله احنا .......ومش معترفين بيهم استغفرالله فما بالك النصارى

وزي ماقلتي عجبتني كلمتك الدين خط احمر صح والله
ربي يهدي من خلق

حبوبه كتب:

سارهمو بصراحه اني مع مرمر في كل كلمه كتبتها

وبصراحه اني لو مكانك مستحيل نحتك بيها يعني زي هذه قلة الصحبه معاها افيد من قربها لو بتجي لي رايي فوتيها خير شن بديري بعلاقتك معاها

اني اول ما تجوزت سافرت لماليزيا وكان فيه واحد عراقي يقراء مع راجلي واحيانا يمشو مع بعض للجامعه وعرفني على مرته وهي ....... وبصراحه من اول زياره جتني فيها ما ارتاحتلهاش ومن حكيها عرفة ان نظام حياتها مايمشيش معاي ومنها على طوووووول هي في حالها واني في حالي اتصلت بيا اكثر من مره وبعدين ايست

وان شاء الله ربي يوفقك للي فيه الخير دائما والله فعلا الوحده صعبه

ايه والله حبوبة حتى انا قلت لزوجي معاش بنمشيلها ولا نرد عليها
ولما تحب تمشيلهم امشي بروحك ونعرفه مايقدرش يخليني ويمشي
ممكن بالشويه بالشويه حتى هو يقلل من المشي عنده
المشكله انه زوجها الحق كويس وصاحب زوجي الروح بالروح
ربي يقدرني عليه ان شاء الله

حبوبه بصراحه اني مع مرمر في كل كلمه كتبتها

سارهمو المفروض معاش تناقشيها بأمور الدين
هما دينهم بروحهم وعندهم معتقداتهم وديانتهم الخاصة واحنى دينا بروحه
اطلبي من صديقتك معاش تتدخل في أمور الدين افضلك باش ماتضايقو من بعض وخاصة أنتي متغربه ومعندكش صاحبات غادي
يعني احكو في أمور ثانية مثال البلاد الا قاعدات فيها شني السلبي الافيها والايجابي اموركم الشخصية لو مفيش مانع أو كل وحده وتحكي على بلادها شني العادات والتقاليد الا فيها
وربي أن شاء الله يقويك يارب

مشكوره امان بارك الله فيك
والله عارفه ومتاكده ان كلامك عين العقل
منحاول لو التزمت كان بها والا زي ماقلت
اصلا بديت تدريجيا نتعود على الغربه والوحده والله بجد
بديت نتعود
وان شاء الله ربي يقوي كل متغرب في بلد مش مسلم
ومشكوره مره تانيه

سارهمو
سامحينى والله انا شفت الموضوع من اول مانزلتيه لكن معنديش وقت نكتبلك والله وانا حاسة بيك حتى انا مريت بيها هذه الحالة
وهذا الاسلوب لكن منتكلمش معاهم فى مرة كنت نقراء فى المدرسة الهولندية وكانت معاى مصرية مسيحية مكنت نحسابها مسيحية
لكن خش الصيف القيت فى دراعاها صليب انصدمت
بعدين سبحان الله اول ماشفت الصليب قلت لها انت مسيحية قالت لى نعم شنو توا معادش بتكلمينى قلت لها لالا عادى انا شنو دخلنى فى العادات والديانات كل واحد ودينه صح
قالت لى اول مرة نحب وحدة مسلمة لكن سبحان الله تبو الحق انا محبيتهاش لانها ديما لبسها يحشم وديما تهدرز مع الرجالة وكل شئ عندها عادى
لكن فى مرة جت عندى للحوش
وكنت فاتحة الجزيرة امشيت انديرلها حاجة تشربها قالت شوفى المسلمين شنو دايرين مافى حاجة مخلينها على حاله
هذا غير دينكم دين السلام وين السلام
صدمتنى
طبعا انا مرديتش عليها لانى هبلة عبيطة ههههههههههههه

كلمة وحدة بس قلت لها انا منحبش الجزيرة ولا نحب نتفرج عليها وغيرت وغيرت الموضوع كله
وبعدها بديت بشوية بشوية انسيب فيها
لانه تقولى علاش تلبسى فى الجلابية طويلة علاش متمكيجيش علاش علاش وتبداء تكسرلى فى رقبتى تمت المدرسة وانهيت علاقتى بيها
هما المسيح ميحبوش من يدخل فى ديانتهم حتى انتى ديرى نفس الطريقة قوليلها لكم دينكم ولى دييييييييين

انا جارتى انحبها نموت فيها وصغارى يموتو فيها وخصوصا شيماء
تربت عندها
وانا من لما جيت لهولندا توا 8 سنوات وانا انطيب لها فى الغذاء لانه كبيرة فى السن
ولما انكلمها على الدين الاسلام تغير الموضوع
يعنى متبيش لكن مش نكرها لا والله
لكن نتوحم عليها بس هههههههههههههههه


سارهمو توا بجد بجد بجد
خليك منها صاحبتك وكلامك فى الاول يدل على انها تبى تسيطر عليك وانا عارفاتك قوية ماشاء الله عليك
وهى تبى تاخد منك الغاية وهى انك فى غربة وبروحك تبى تسيطر عليك وديما على قولة مرام رقى نفسك والقرأن
وكل ماتفتح لك هذا الموضوع قوليها لها لو سمحت انا منحبش منو يتكلم على دينى انا انشوف فيه مافيش احلى وارحم واصدق من دينى

وخلااااص
نفختلك راسك بالدوى مش عارفة شنو واكلة من الصبح ههههههههه

عيت من الكتيبة

صحيتي ياام الشيماء انا رديت لانه عجبني كلامك

بس قوليلي ههههههههههههههههه شن واكلة هههههههههههههههههه

انا تقريبا اكثر وحده نحكي لاني محرومة حتي من صاحباتي من كثرة التنقل

لكن معايا اللي احسن من كل شئ ومن كل حد

الـــــــــــــــــــــــلــــــــــــــــــــــــه

شكراً للحديث الجميل الشيموات قالوا لي انا نبي نقولة ربي يكون في عونك ومرام وام شيماء عندهم الحق لانهم عايشين زيك في غربه ربي يرعاك

ما شاء الله العضولت اللي ردوا كفوا ووفوا

لكن يا سارهمو دايما خلي في بالك انك مسلمة رسالتك في الحياة اعلاء كلمة الله ونشر الاسلام, لقيتيها متعصبة للمسيحية و حاوريها بطريقة علمية بحته, يعني اشرحي لها تعاليم الاسلام والعادات الاسلامية بطرق علمية بحته وما شاء الله النت عندك وتقدري تطلعي كل اللي بدك إياه منه, خليكي دوما قوية الشخصية دون عصبية وخلي أجمل الكلمات على لسانك امامها, وذكر الله دوما وهادية مطمئنة وموقفك هذا يجعل منك واجهه للدين الاسلامي امامها, وهذه صفة وشرف يفتقدها من يعيش بين المسلمين في دولة اسلامية , لأنهم ببساطة كلمهم مسلمين, ولو هي لبست الصليب البسي أنت اسم الله...

المهم تصرفاتك أمامها تكون هادية دون تعصب, لو وجدت نفسك دخلت في نقاش انت مش قدك اوقفيه بلطف ولما تروح ابحثي في الكتب أو النت وزيدي ثقافتك الاسلامية , وسبحان الله لو جعلت الدفاع عن الاسلام هدف والدعوة له سيجري الله الكلام على لسانك زي ما قالت مرام....

بارك الله فيك

بصراحة الكل قالن المفيد بس مرام ابدعت في ردودها برافو مرام انا شايفة انها ما وقفت عليها يا سارة وواضح انها تبي تجرك بالناقص منها ومن شكالها وبالنسبة للحوارات اللي تفتح فيها معاك على أمل اقناعك باللي في راسها فأنصحك تقوي معلوماتك اذا ناوية تناقشيها والا فلا لأني سمعت الشيخ العريفي في رمضان يقول لا تناقش الا بالعلم والدليل والحجة المقنعة ونحن عامة المسلمين محتاجين نقووا روحنا اكثر في هالامور وربما يلقوا في هالشي منفذ فسكري عليها وربي يقويك انا نعرف انه فيه مراكز اسلامية في الخارج ليش ما تمشيلها وتتعرفي على مسلمين واذا كنتي في كندا فيه جالية ليبية غادي نتصور اكيد عندهم مكان او رابطة تجمعهم حاولي في هالخيارات واذا ما لقيتي سبيل فمعاك الله ومن وجد الله فماذا فقد؟ ولا شي حبيبتي حضرني توا حديث الرسول (انما المء على دين خليله فلينظر احدكم من يخالل) ردي بالك من روحك ومن راجلك وسمعينا الاخبار الطيبة.

نحن معك يا زينة لكن سارهمو تريد طريقة للتعامل مع السيدة الأخرى وليس هناك مجال للابتعاد عنها كما فهمت, لذلك أفضل شيء هو أن تتعلم كيف تدير حواراتها معها بطريقة تكةن في صالحها وصالح الاسلام أولا وأخيرا

أم غفران كتب:

شكراً للحديث الجميل الشيموات قالوا لي انا نبي نقولة ربي يكون في عونك ومرام وام شيماء عندهم الحق لانهم عايشين زيك في غربه ربي يرعاك

والشكر ليك ام غفران على المرور
والبنات ماشاء الله كفوووا وووافو

وربي يرعانا اجمعين
مشكورة