الخو خو مراته وأخته تحلف بحياته

الصراحة موضوعك يخصنا كلنا

انا اعتقد السبب الاول طريقه معامله الاخت لخوها

والثاني معامله الاخت لمراة خوها

الاول اذا كانت الاخت حنونه وكويسه وواخذع جو الصراحه وعارفه معني الاخوة وبانيه جدار قوي معاه وهو نفس الشي

اكيد اخوتهم تظل مستمرة مهما صار ومهما حدث

والثاني معاملتها لمراة خوها اذا كانت محترمة خوها ومراته اكيد المرا تحترمها وتربط اواصل الاخوة والصداقه معاها

واذا كانت تحس في المراة هذي غريم لها وادير راسها وراس المراة وماتحترم لاخوها لا المراة البرانيه اللي معاه

اكيد المرا تكرهها ويسير وحده من الاثنين ياتكره الراجل في اخته ياخوها يكرهها من تصرفاتها مع المرا

وانا مع عدم التدخل بين الزوجين وخصوصا في احوال الزوجه واحترامها من احترام خوها وتقديرها

وليا عودة بكم هائل من قصص صارت لناس نعرفهم حق المعرفه سواء في معامله الصبيه او كما اتقولوا الحماه الخاطئة او

في معامله زوجه الاخ الظالمة

ودائما الشخص يحط نفسه محل الاخر اكيد اسلوبه يكون احسن

ام ماب صحيتي قليله موفقه

أعجبتنى وجهة نظرك يا مرام

هياننتظر المزيد

موضوع من واقعنا الاجتماعي
مرام عجبتنى وجهة نظرك وانى مع رايك

لان لو الاخت عاملت زوجة الاخ معاملة كويسة وخلت فيه بينهم الاحترام في المعاملة وعدم التدخل في خصوصياتها وعدم اعطاء الراي في المواضيع الخاصة بينها وبين زوجها اكيد حتى زوجة الاخ حتكون معاملتها مع حماتها كويسة واكيد انها مش حتحاول ابعاد زوجها عن اخته بما انها لم يلحقها اى مضايقات منها
واكيد الاخ لو وجد احترام لزوجته من قبل اخته ووجد حبهم لها اكيد مش حتتغير معاملته وحيفرح بحبهم لزوجته
والاخت ادا كانت تحب خوها وتعزه تحب زوجته وتريحها وتتمنالها كل شى حلو لانه لو ارتاحت زوجة الاخر حيرتاح خوها وكل اخت شنى تتمنى لخوها غير الراحة والسعادة

ويا ام ماب حتى احنى قربت ان شاء الله غير تجينا بنت حلال وتريحه وان شاء الله ربي يهنيهم

كلامك كله عسل ياام ايوب وانا حسيت ان خوك قريب يزوج ونتمنالكم اتجيكم بنت حلال وتحبوها وتحبكم

نبداء بااول القصص بس باختصار لان لو نبي نسرد معش تفض

في واحد كان يحب وحده وشاء القدر ان ازوج بنت خوها لانها ازوجت وطبعا هو تاثر وقال حناخذ بنت خوها

والبنيه اللي خذاها ماشفتش مرا في طيبتها لعند ماشخصيتها ممسوحه الجمال ماشاءالله عين خضرة وشعر اصفر والاب والام ماتوا وهما

صغار وسيبوهم لاعمامهم ربوهم وازوجت الرجل اللي نعرفه وهو كويس وهلا نفس الشي لكن انصدمت لما شفت حالتها

شغاله كوجينه وحوش دايرينها وهي فم ساكت تخيلي حتي اللبس يلبسوها هما مسحوا شخصيتها وللاسف ولدهم مايحكي ولا حاجة

مخليهم زايطين فيها وهي ياعيني ميته وهي حية صغر سن ويتم الابوين وشخصيه ممسوحه

وليا عودة بقصه ثانيه شن رايكم في هالقصه

أم ماب أولا ربنا يبارك لخوكي ويتمم على خير ويرزقه ببنت الحلال اللي تخاف الله وهذا أهم شيء....

ثانيا بالنسبة لموضوعك وهو مهم وممكن لو ناقشناه بطريقة صحيحة نحل كثير من القضايا الأسرية اللي منكدة على الكثيرين....

الأخ فعلا له مكانة مهمة جدا عند الأخت وأنا ألاحظ ذلك منذ الآن مع بناتي فبنتي الصغيرة دايما تحاول تحمي أخوها من العقاب وتسكت على عمايلة هههههه.....

الأخ قبل ما يتزوج يكون لأخته غالبا نصفها الآخر

فهي تعتمد عليه كثيرا, وتاخذ رأيه في أغلب أمورها وبالخص لما تحاول التعرف على العالم الخارجي ومن وحهه نظر ذكورية يعني اخوها مرآتها للعالم الخارجي, وعندما يتزوج الأخ ينشغل عنها ويصبح مشغول بأمور تانية بالطبع, وهذا أمر لابد أن تقدره الأخت والأسرة ككل, فالأخ الصالح يحاول أن يرتب أموره بحيث أن يشعر زوجته أنها أحب إنسان لقلبه, وأن أخته لاتزال مكانتها محفورة في قلبه مهما حدث, وليست الزوجه سبب في كره الأخ لأخته ولو حدث ذلك على أرض الواقع فإن الأخ مهيأ نفسيا لذلك من خلال تربيته من قبل ووجد من يستغل هذه النقطة. لو كانت الأخت تقدر وضع اخوها الجديد فسوف يحبها دوما ويلجأ لها دوما, والأخت يجب أن تحترم زوجته وأنا هنا أتحدث عن الاحترام وليس بالضرورة الحب يعني لو الأخت ما قدرت تحب زوجه أخوها مش ضروري, المهم تحترمها وبذلك تضمن حب أخوها لها....

وهنا لايجب أن نخلط بين علاقتنا بزوجه الأخ والأخ نفسه

وأنا أعتقد أن الترابط الأسري من البداية والتربية المبنية على الحنية وحب الأخوة هما الفيصل في هذا الموضوع, فأخ تربى على تفكك أسري وصراعات داخلية أكيد سوف يأخذ زواجه ذريعة للانفصال عن الأسرة أم من تربى على الحب والحنان والترابط الأسري فإن أسرته ستكسب من وراه زوجه بمثابة الابنة الجديدة لهم وأحفاد صالحين بإذن الله....

بإذن الله لي عودة

موضوع في منتهى الاهميه مشكوره عليه يا ام ماب

بصراحه اني نحس لو تربيتهم صحيحه ومبنيه على اساس ديني فامعتقدش انه يتغير الاخ مهمه صار

وايضا لو الاخت عاملة مرة خوها بادب واحترام واهم شئ عدم التدخل في الامور الخاصه اكيد هذا الاسلوب رح يحبب الاخ في اخته اكثر ومعليش لو سمعتي منها كلمه ضايقاتك فوتيها مش لازم توقفيلها على الكلمه ديري روحك ما سمعتيهاش بيش المركب يمشي


اني بصراحه من خلال تجربتي مع حمواتي لانهم طبعا ما فيش زيهم الحمد لله دائما يعملوني وكاني اختهم مش مرت خوهم لدرجة انه ما فيش اسرار بيناتنا وديمه يحبولي الحاجه الباهيه والراحه واكيد خوهم يشوف في هالمعامله ونحس فيه مش تغير عليهم بالعكس بدي يتعلق بيهم اكثر من قبل ويسأل عليهم اكثر من قبل واني طبعا فرحانه من هذا الشئ

ادعولي ربي يحميهم ويرجعهم بالسلامه لاني استاحشتهم هلبه وهما مازال ماروحوش من العمره

مرام القصه لي كتبتيها والله الحال يبكي لا حول ولا قوة الا بالله ربي يكون في عونها وان شاء الله كل شئ باجره

ادعولينا ان شاء الله تطلعلنا بنت حلال وتخاف ربي لان خوي خاطب وخوي هذا احنيني هلبه هلبه وخدوم واحني كلنا متعلقين بيه هلبه حتى يمكن لو لاحظتوا انه لمه نجيبوا في سيرته نكتبوا الغالي

فعلأ لا يوجد اي مثيل للأخ مهما كانت مراته واي احد واله لوكانتي في ضيق تجديه رغم كل شي صد منيع لااي سواء ياتي اليكي صدقيني وأخ وأخ على هذا الزمان شكراً موضوع مميز أم ماب ومنكي ياتي الجديد شكراً على التميز

اني انحس ان التغير اللي ايصير للاخ كله من مرته قصدي المرأة هي اللي تصلح وفي اللي اظل وهذا كله نعتبره منعكسة علي تربية البنت في حوش اماليها وبالدرجة الاولى علي امها ولان اللي اديريه في الرخيص تلقيه في الغالي لان كلها سلسلة متصلة ببعضها كان المراة غيرت راجلها علي خواته اكيد بتجي وحدة بتغير خوها عليها والحياة كلها احترام وتفاهم كانوا ضاعو الاثنين معناها خلاص الحياة انهدت ومعش ليها معنى


تقبلي تحياتي يا ام ماب موضوع هادف ويمس حياتنا هلبة

انا بنتكلم عن تجربتي عند خوي نشبح فيه وماني مصدقة مكبدة عليه تقول ولدي مع انه اكبر مني وما كنت راضية عن البنت اللي اختارتها أمي باش يتزوجها عندي الحاسة السادسة!بعد الزواج تغير علينا ماعاد يجينا غير في المناسبات والا مقضاة مصلحة وطول الوقت عند نساباه ومراته كان جاتك ضحكتها من ودنها لودنها وكان جيتيها تقلب وجهها ومع هذا ما زلت نحب خوي ونقول يمكن نحن معليين سقف توقعاتنا وهادي سنة الحياة لازم يكون اهتمامه بمرته وصغاره رقم 1 في حياته بس الحق انه مهنينا على حاجات ياسرة وهادي حسنة كبيرة تخلينا نطنشوا على ما عداها.

انا بنتكلم عن تجربتي عند خوي نشبح فيه وماني مصدقة مكبدة عليه تقول ولدي مع انه اكبر مني وما كنت راضية عن البنت اللي اختارتها أمي باش يتزوجها عندي الحاسة السادسة!بعد الزواج تغير علينا ماعاد يجينا غير في المناسبات والا مقضاة مصلحة وطول الوقت عند نساباه ومراته كان جاتك ضحكتها من ودنها لودنها وكان جيتيها تقلب وجهها ومع هذا ما زلت نحب خوي ونقول يمكن نحن معليين سقف توقعاتنا وهادي سنة الحياة لازم يكون اهتمامه بمرته وصغاره رقم 1 في حياته بس الحق انه مهنينا على حاجات ياسرة وهادي حسنة كبيرة تخلينا نطنشوا على ما عداها.

ما أحلى تبادل الاراء ومناقشتها فى المواضيع الاجتماعيى اللى تمسنا ومن واقعنا الاجتماعى

انى رأى أن فيه مبادى تتربى عليها الاسرة وتستمر مهما جوا من كناين


اولا لاخ يكون حنون على أخته وين ما تحتاج تلقاه واقف وين يتزوج تباء رأسها من رأس مراته

اهى مشت اهى جت أهى شرت أهى ما قلتلناه وغيرها وغيرها

حرام عليك ايها الاخت هذه حياتها وكينونيتها الخاصة

اللى تبى تخلى خوها زى ماهو تحترم مراته وتحب صغاره

هذا الشىء اللى يستنى فيه منك وهذه الخدمة اللى تقدرى تقدميها ليه

وأكيد هنا الاخ مش كا يتغير

طبعا فيه النوار اللى تنكره فى أهله هذه طبعا مش بنت بيتية


والاخ المتبى لايسمع كلام أخته ولا مراته ديما مع الحق ا كل متزوجة مجربة زى ما تبى خوك حتى زوجك يبوه خواته


والبنات ما تديروش رأسكم من رأس نسوين خوتكم عل الاقل على خاطر خوك

واللى بتديريه فيها والله الا ما تلقيه قدامك

الاحترام المتبادل هو اللى يولد الحب

وبيش تكسبى خوك خلى مرأته زى أختك أحسبيها فى كل شىء وتفكريه مش يتلقوا الاخوات وما ينادوش مرات خوهم

هذا كله بيحس بيه الاخ وبيتغير بروحه من غير ما تقوله مراته

وشكرا مرام ومها على التهنئة بمناسبة خطبة خوى

يا خوى يا تاج رأسى .............. وين نستحق نلقاك واقف على راسى


حتى اللى خيرت فى زمن الصحابة بين خوها زوجها وولدها

أختارت خوها وقالت :

الزوج موجود ..زوالابن مولود .. لكن الاخ مفقود

ياسلم خال ضراريا ......... اللى ما يرضى العيبة فيا

ياسلم خال ضراريا...........يا مولاى تصونه ليا

مشكورة ام مآب على الموضوع اني مازال باش نجرب مرت الاخ
لكن اني نشوف في الكل يقول على المراءة ليش الاخ مش صغير يشوف ويسمع معقولة تجئ المرا ة تقلبه ليش ميعرفش اخواته والا امه منديروش العيب كله على المراءة كان حتى هو على سبلة من مراته يستنا منها في كلمة باش تغيره معناها حتى هو من الاول بلهون لكن في الاخير فيه مراءة تصلح العلاقة وفيه اللي تزيد الطين بلا
ولي عودة انكمل فيها وجهة نظري

السلام عليكم
موضوع سبق وقراءته في منتدى اخر
لكن ما يمنعش انقول رأئي
الاخ على تربيته من الاساس ان احسنوا الاهل تنشيته على حب الاخوات والتودد اليهم والالفة
يكبر وهو متعلق بيهم لا يمكن لي احد ان يبعده عنهم
بس اذا من الاول كان الاب والام يفضلانه عن باقي اخواته ويعملونه على انه هوالافضل والمميز بينهم واذا حصلت مشكلة وقفوا معه برغم من خطأه بمجرد زواجه يبتعد عنهم وطبعا مع شوية ابر من زوجته ينساهم مرة وحدة
الله يدوم محبة اخوتنا لنا وما يحرمنا منهم

مشكووووووووووووووورة

السلام عليكم ورحمه الله وبركاته

طبعا اكيد اختي ام ماب
تعرفي حطيتي ايدك عالجرح
سبحان الله قداش مالواحد يتغير بعد مايتزوج
لكن هذا متوقف على شخصيه الراجل نفسه
بغض النظر عن ثاتير زوجته السلبي او الايجابي
من تجربتي خوي اللي على راسي والله مانبالغ لو قلتلك انه تؤم روحي
وكنا ديما مع بعض للدرجه انهاللي يشوفنا مايقولش خوت
وكان بيت اسراري نحكيله كل كبيره وصغيره
ولما تعرف على زوجته اول من عرفني عليها وهي تعرف قداش علاقتنا وطيده وقويه
اول ماتزوجت كانت تسعى انها ترضيني حترى ترضيه هو
وبعدها بالشوية بدت تتغير وتحاول تغيره وكان هو يعطي فيها على راسها يقوللها لا اختي ساره
ولو في يوم تعاركتي معاها تاكدي اني حنجي معا ختي
والله المستعان والله ربي طيحنا في كنه واله مانبالغ قلبها اسود وحقودة
ودارت هلبه فتن في العيله من لما جت ومع الوقت خوي شد روحه وبدي يميل لكلامها
سبحان الله كيف قدرت عليه
والله كان حنين هلبه علينا وعلى ماما تخيلوا توا يسكن فوقهم ويقعدوا بالاسبوع مايشوفوش
حسبي الله ونعم الوكيل فيها
والله والله مانزكي ماما والله ماعندها على التدخل وتعامل في الكناين والله احسن مننا لكن الله غالب بخوت
خوي الثاني مع انه اصغر لكن فارض شخصيته على زوجته
ولما تغلط مايتهاونش معاها ماهو قلتلكم كله مبني على الشخصيه

انا والعياد من كلمه انا مع ان زوجي من يومه بعيد على عيلته والله من لما تزوجته حريصه انه ديما يسئل عليهم ويدورهم
والده ووالدته متوفيين ومع هذا ديما نقول اتصل بخواتك وشوف اخبارهم
وفي العيد والله ناخد التلفون وكل مرة نتصل بوحده نقوله يكلمها وعنده اخت وحده صبيه والله والله في العيد هو كان ناسي بس قلتله لازم تبعتلها فلوس وهكي دار
وديما نوقض فيه ان يتصدق على والديه الله يرحمهم
الزوجه ليها تاثير كبير على الراجل هذا اكيد بس يا ريت الزوجات ياخدو الجانب الايجابي مش السلبي في التاثير هذا
سامحيني اختي ام ماب طولت بس عجبني الموضوع وعندي فيه مانقول
سلام

دنيا المحبة كتب:

السلام عليكم
موضوع سبق وقراءته في منتدى اخر
لكن ما يمنعش انقول رأئي
الاخ على تربيته من الاساس ان احسنوا الاهل تنشيته على حب الاخوات والتودد اليهم والالفة
يكبر وهو متعلق بيهم لا يمكن لي احد ان يبعده عنهم
بس اذا من الاول كان الاب والام يفضلانه عن باقي اخواته ويعملونه على انه هوالافضل والمميز بينهم واذا حصلت مشكلة وقفوا معه برغم من خطأه بمجرد زواجه يبتعد عنهم وطبعا مع شوية ابر من زوجته ينساهم مرة وحدة
الله يدوم محبة اخوتنا لنا وما يحرمنا منهم

مشكووووووووووووووورة

بالعكس اختي دنيا المحبه
التربيه ماليهاش علاقه ممكن تربيه على الاخلاق والاستقامه ايه
لكن في السلوكيات الثانيه لا لانه بيتغير حسب الظرف اللي عايش فيه
هذا اللي اكتشفته
وشوفي ردي

بارك الله فيك ام ماب على الموضوع
واانا اسفة على التأخير فى الرد

انا ليا ثلاثة اخوان

واحب لقلبى اصغر واحد فيهم وهو توا قريب امى تخطبله ورغم هذا كله امى متيش تخطبله لانه تقول صغر واان نعرف انه مش صغير لكن امى متقدرش تستغنى عليه
ومرت الاخ على حسب معاملتك انت معاها تعاملك لكن فى اللى ماينفع فيهم الخير على ماتعامليها بالخير مايفلقش معاها هذه تربيتها
وحبى لخوتى زاد اكثر بعد ماتزوجت لما نزعل نتمناهم جنبى والله لما نسمع بيهم عندهم مشكلة او اى شئ معادش نقدر نرقد انحب اخوانى اكثر من خواتى البنات
حى عليا من احلام
ولى عودة ااخواتى للنقاش


دمتم بصحة وسلامة وعيشة هنية للأخوانكم

والله كل وحدة ووجهة نظرها واني قريت كل الردود بس ماتنسوش شئ مهم عامل الغيرة
الغيرة تصير عند الزوجة والاخت الزوجة اللي تقول خلاص يعني يلهى بشغله وبعائلته وفي نفس الوقت مع اهله لكن شوفوا يعني اكيد مش حيكون زي الاول لانه قبل فاضي بس توا عنده مسؤليات ومراء يقعد معاها وصغار يشوفهم مع شغله بس هادا كله ميغنيش على امه وبوه واخواته بس مش حيكون زي الاول اكيد مش لانه تغير بس لكثرة مسؤلياته
والاخت تقول لا مهما كانت مسؤلياته ميتغيرش علينا هلبا يعني شني لو تزوج يقعد شوي وينزل هو وياها
وكل واحد وقناعته بس والله المظلوم في كل هذا الراجل يعني امه وخواته ومرته وصغاره وربي يعين

بس نرد ونعاودانه مسؤلياته كثرت وبدت عنده حياته المستقلة معاش حيكون متوفر كل الوقت وكان عاد المراء حرفة هاداكا بروحه زي سارهمو فوق اهله يعني اقل شئ في الطلعة والردة يمر يشوف امه واهله ومش حيضر شئ والا اللي في المناسبات بس يشوف امه ان شاء الله ربي يبعتلنا بنت الحلال يا رب والله كلنا امهات وان شاء الله انديروا كناين واللي بديره الكنة بتلقاه في الغالي

واللي يبيع امه وخواته على خاطر مراه يبيعها غضوة من غير شئ

الحمد لله خوتي معانا زي قبل زي توا والحمد لله كناينا ايخافو من ربي وماشاء الله الحق وفي هلبا ناس انشوفو فيهم مشاكل مش طبيعية
وفي حاجه تانيه مرات العيب مش في الكنه مرات العيب في الاخت هيا اللى غايرنه وتسبب في المشاكل وفي ناس اطلقوا وفسخوا بسبب الاخوات والمشاكل الله ايديرو فيها

وربي يهديهم بارك الله فيك على الموضوع

والله الحمدلله احني خونا ماشاء الله عليه
وهي مرتا نحبوها زي اختنا بالزبط
بالعكس يعني هي ماشاء الله عليها

واحني مش مقصرين معاها
غير كل واحد يعرف قدر لاخر تمشي الحياة صح
ومافيش حاجة تستاهل التناحر والواحد يقعد يصحن في روحا على شني

الدنيا دوارة واللي بيدير الباهي بيلقاه
ولما كل وحدة تحط روحها في مكان اللي قدامها
تعرف ان الدنيا بتلود وزي ما يقولو اللي تد
يريه تلقيه

صحيتى ياأم ماب على الموضوع الرائع والواقعى جدا
بالنسبة لوجهة نظرى ان شخصية وسلوك الخو هى اللى تحكم فى الموقف وهى اللى اتاثر على كل شى
وانشالله ربى يسترنا

زوزو انا معك قلبا وقالبا