الفرق بين أفراح زمان وأفراح اليوم

تذكير بمساهمة فاتح الموضوع :

السلام عليكم
أخواتى أصبح فيه فرق شاسع بين افراح زمان وأفراح اليوم

زمان كان العرس فى طرابلس خطبة تقليدية للولد وفيها يمشوا أماليه يجسوا النبض عند أمالى العروس

وكان وافقوا يمشوا الرجالة يتموا ويدفعوا والعرس يوصل حتى سبعة أيام وسبعة ليالى

وكان مليح يشوفها مرة والا أثنين قبل العرس

المصاريف معروفة بدلة كبيرة وبدلة صغيرة ودهيبات وشوية فجرة والعزومة

اليووووووووووووووووووووووم :

يتعرفوا فى الشارع أو فى الكلية أوعلى التليفون أوعلى النت وزى ما قال محمد حسن :

عامين بالعين تمقيل ........ وعامين ضرب المعانى ......... وعامين دز المراسيل ........ وها العام جيته وجانى

بعده يحبوا بعض وفترة خطوبة ربى يعلم بمدتها

وعندك الفضانية والبيان ومصاريفهم وزيد العيدية وفى العاشورة والميلود بيرفع لزومها وكبش العيد قرونه ملوية

وممكن يتزوجوا أوممكن بعدين مايعجبهاش أو ماتعجباش

وكان صار وتزوجوا عندك أهم حاجة حجز الصالة والزمزامات

طبعا الصالة اللى أقل من 1500أخى عليهامش حلوة

والزمزامات اللى أقل من 500مايصلحوش قاعدات يتعلموا

وطبعا كلامى مش على الكل لكن الاغلبية

واللى يديروا فى جمعية والسلف المصرفية ويتسلفوا

بيش ينستروا قدام الناس ويتباهوا

أخواتى تواء قولولى شن رايكم واللى عندها فكرة على عرس فى منطقة تانية تخش تقول

تحياتى

أم الحلوين فتحتى موضوع الاعراس فى سبها

أنى جيرانى من سبها وحضرت علرس ولدهم وماشاء الله صح العادات مش زينا بس حلو واللى عجبنى انه

ما تخلوش على عاداتهم وتقاليدهم حتى هم فى طرابلس

كله داروه

أنى تحترم الانسان اللى ما يتخلاش على عادات بلاده

وماشاء الله قداش عندهم من ترابط أجتماعى شىء غريب

ايه روعة الترابط اللي عندهم ومش من جهة الاقارب بس حتى من الجيران واعراسهم مختلفة وحلوة حلوة

فعلا أخواتي الترابط الاجتماعي والمحبة هي اللي تخلي العرس فعلا جميل ومبهج وكله فرح وليس كم دفع فيه..

لأنه العرس هو ترابط عيلتين مع بعض مع معارف كل من الطرفين...

ام الحلوين ما شاء الله شوقتينى نحضر عرس في سبها الفرق بين أفراح زمان وأفراح اليوم - صفحة 2 295571

هيا اللى سبهاوية تعزمنا على عرس في سبها

ام الحلويين عجبني عرس سبها حتى اني صارلي زي ام ايوب نبي عرس في سبها دبريلنا فيه هههههههههههههههههه

وحسيت عاداتهم مش زينا مختلفه هلبه علينا

ام ايوب وحبوبة خلاص اول ميصير عرس سلفي نعزمكم مش تقولوا مش جايين ومع العوالة باش ميفوتكم شئ وبعدين توتوا رواحكم هههههههههههههههههههههههههههههههههههه
اعراسهم مختلفة علينا لدرجة كبيرة طبعا منعرفش سبها المدينة زيهم والا بس والله روعة وعندهمحاجة يسموا فيها سيك على وهي الاغنية هكي مع الطبل والطقة متاعهم خيالببببببببببببببببببببة وطبعا مش زينا شيانة يوم حنة البنت تطلع لابسة ردي احمر بذهبها كله كانه صدرة ومكياج عروسة واتية بالكامل وبعد ميتفرجوا عليها ينحوا الذهب ويحنوها
ويوم الدخول يمشطوا شعرها بالخمرة وحاجات هلبا عندهم مش زينا
كملتلكم الموضوع هذا غير مش متفكرة ههههههههههههههههههههههههه

موضوع مش عادي ام مأب
وهكي فتحتي مجال للحديث عن أعراس زمان وأعراس توا بالنسبة لكل منطقة

صح ام الحلوين اختي من مدة تزوجت في سبها
تقريبا نفس الحاجات اللي تكلمتي عليهم
يوم الاربعاء عندهم الرمي يعني ايغطو العروس بالفراشية ويلبسوها المور وايغنو في اغنية ويرمو عليها الحلوة للصغار
وادور ام العريس بالخمرة على المعازيم ويدهنو منها وبعدين يلبسوها البدلة الكبيرة بالدهب متاعها
وفي يوم الخميس يضفرولها شعرها بالخمرة
ولما تمشي لعندهم يديرولها اسبوع ايسمو فيه اسبوع الحجبة
كل يوم يصدروها بي لبسة
عموما
توا انرد على الموضوع ومستعجلة لاكن نوعدكم ليا رجعة نحكيلكم على العرس في الزنتان بالتفصيل

أم ايوب رايته الطبل فى عرس جيرانى يقعمزوا عليه مجموعة ويدربكوا

وكلمات الاغانى فيه منها زينا بس اللحن يختلف

لكن عرس حلو

أخواتى نبوا نعرفوا عرس الشرق والجبل وكل مناطق ليبيا هيا خشوا واتحفونا

أخواتي حبابة اعرف ايش هي الخمرة

هل هي خلطة للشعر أو بخور؟

السلام عليكم ورحمة الله وبركاته

والله موضوع كبير الاعراس ومصاريف هلبااااااااااا والمشكله في ناس اتكلف روحها فوق طاقته انى اللى نعرفه العرس اتكون فيه لمة الاحباب والاقارب والصحاب يفرحوا بيك ويساعدوك ولكن توا تلقي من يقهرك ويزيد على مابيك صار موقف معانا قريبتنا بدير عرس بنتها واحنى مانمشوش عرس فيه اغاني وهي قريبه هلبااااااااااااااا منا المهم سالتها ماما بدير اغاني قالتها اكيد مايجيش عرس من غيرها واللى يبي يحضر باهي واللى مايبيش سلامته يعني فضلة الاغاني على حضور اقرب الناس ليها وحرجت وقعدت 6 شهور ماتكلمش فينا على اساس مافرحناش ببنتها قلتلهم سبحان الله فرحة العرس بلمة احبابك مش بالاغاني

وموقف تاني سمعت بيه شن التبذير اللى صاير غير حكاية الصالة والزمزمات والكونفيتي
اتصدقو في عرس يوم النجمة جايبين زمزمات الرمو عليهم قالو 6000 شوي بورقة 50 وورقة 20 علاش هذا ناس مش لاقيه تاكل وناس اتلوح في الفلوس على الارض على خاطر الزمزمات قالو شي يقزز سبحان الله كيف يفكرو الناس منعرفش كفر بنعمة الله نسميه هذا وربي يهديهم ويصلح حالهم

والمفروض كل واحد على قد فراشه ايمد رجليه ليش الدين والسلفه علاش يعني لو دارت عرسها في اكبر صاله وفرقة الزفه وزمزمات بتعيش متهنيه

يسلمو على الموضوع اختى فرق بين فزعة وفرحة زمان وفرحة وفخفخة اعراس توا

مشاركتك رائعة سناء

بارك الله فيك

وفيكي بارك الله عزيزتي موضوعك رائع ويمسنا جميعا كمجتمع ليبي

تعالن جاي بنخبركم على عرسنا وهو ما تغير ياسر بين قبل وتوا الخطبة زينا زي العامة غالبا علاقات ونادرا روادة تنتهي ايضا نهاية سعبدة يعني كل الطرق تؤدي الى روما وتوا بعدما وصلنا روما اللي هي العرس تفضلوا معاي البداية تكون قبل بليلة من عقد القران(الفاتحة) ويسمى (التشوير) هل العريس يلموا ناسهم بعد صلاة المغرب يعشوهم ويمشوا في موكب لبيت هل العروس اللي يكونوا مدايرين نفس الشي ويخشوا عليهم بالطبل والغنا وثنيناتهم هل العريس وهل العروس يقعدوا ويعطوا 3 وصلات من اللي يحبهم قلبك وبعدين يجيبو العروس مكمكمة في ردا ويكونواجايبين مهراس لوح كبير(كرو) فيه عطرية وتاخد العروس يد المهراس وتدق 3 دقات وهذا معناه بدينا العرس تاني يوم الفاتحة يعقدوا قبل الغدا واحيانا الصبح ويعزموا هل الراجل عزومة كبيرة ويذبحوا الزوايل والغنم كل واحد وقدرته ويجيبوا لهل المرا القضية والعطرية والذبيحة متاع هالنهار وهل المرا يذبحوها ويزيدوا عليها من عندهم كل واحد وقدرته ويدقوا العطرية وبعدين يغدوا عربهم والغدا رسمي فتات وهريسة وفي العشية جهاز المرا كامل يوروه وفي الليل الحنة وعندنا تلبس العروس اللون الحني او البودري وتاني يوم يوروا جهاز الراجل كامل وفي الليل البمبر وهو اهم شي في العرس سهرية لوجه الصبح وتدخلها العروس باغنية معينة يرددنها مجموعة نساوين محوطين العروس من كل جهة وفوق راسهم فراشية كأنه موكب والعروس تقعد على البمبروهو مكان مرتفع عليه صالون بحيث تكون اعلى من كل المدعوين ومغطية بفراشية وعلى راسها مرا ماسكة مبخرة وتالت يوم المرواح(الدخلة) مافيه طقوس واغلب الناس تكون عند هل العروس في الغدا وعند هل العريس في العشا وتلبس العروس البدلة الكبيرة والعريس بعدما ياخد العروس ويطلعوا في موكب ويوصلوا بيت الزوجية يطلع مرة تانية ينزف على الارجل من مسافة قريبة من بيته واليوم اللي بعده الصباح (الصباحية) عزومة غدا على هل العريس للاقارب والحبايب بس وبعد اسبوع عزومة غدا بمناسبة السبوع وفيها العروس تربط حزامها وتحط 7 لحمات في اول طنجرة ينصبوها للغدا وحتى هي على هل الراجل المساكين وفي هاليوم توري العروس اماعينها والاجهزة المنزلية اللي 99% يكونن عالعروس وتقبل الهدايا الخاصة بالبيت في هاليوم اما الهدايا النقدية والذهب فمن اول يوم ويقولوا عنهن للكل عندما يوروا جهاز العروس وجهاز العريس كل واحد على حدة.نسيت نقوللكن اذا العروس بتدير حفلة بنات فهي غالبا يوم التشوير او يوم الحنة ولا نعرفوا زمزامات ولا صالة احنا مازلنا نسكروا في الطريق بخيمة واذا البيت واسع نحطوا خيمة عالسياج البراني وربي يكثر من المناسبات السعية عقبالنا يا سنا

زينة عقبالك حبيبتي أنت وسناء وكل الصبايا

شرحك حلو كثير, سلمت

مشكورة زينة على الشرح الوافى والعقبة ليك أنتى وسناء

لكن زينةماقلتيش منين بلادك ؟؟؟؟؟؟؟؟؟

قولينا هده الافراح فى أى بلد

وأحسن شىء عجبنى أفتكيتوا من الزمزامات والصالة

ماشاء الله حلوه اعراسكم العقبال ماتشرحيلنا عرسك باذن الله وبارك الله فيكن ام خال د وام ماءب على الدعوه الحلوه

ياريت أخواتى شوية تفاعل مع الموضوع

خشوا وكل وحدة تحكيلنا على أعراسهم هيا