حواربين الشاعر والناقة

قالت بالله تطلقني بنعمل حومة..فدراج راني ماقدرت نرومــه
قلتلها وين تحــــــــــومي..جذب شير ماعنــــدكش غير تلومي
وانا عليكن راقات عزومي..ومرار عند الريق في البـــــلعومة
وكيف ياخويلة بالكلام تلومي..وهي الوجــــــــبة بيننا مقسومة

قالت عندي جلـــــــــــــــــــــــوة..قدا بطن سامح والمية حلوة
ونرقى على علوة نحـــدر علوة..من الشر بالشرقي نشم نسومه
ونفتك من فدراس شينــــك بلوة..اللي بالكنايس جلدته مردومه
قالت عندي برمـــــــــــــــــــة..قدا وطن عندي شان فيه وحرمة
ونطلع مع خرمة تواكي خرمة..نخش فج مافيشي غنم مرهومة

نبـــــــــــــــــــــغيك ياشيباني..نبي رفقتك ياشيخ ماتخطاني
موش كيف هاللي جايني براني..ايعد بالدقايق لين يكمل يومه
كانه عقلني نحس في سيقاني..وكانه طلقني لوغته مبرومة

قلتلها تبغي ســــــــــــــــيدك..وكانلا كبير السن موش نديدك
وحتى يرافقك ياقود مابيفيدك..ويبقى يتهارى كاترات همومه

قالــــــــــــــــــت ديرلي سيارة ..وفي كرهبة ياشيخ موش خسارة
واني نجيبها وقت المعاش مرارة..ان كان قمتني تبقى عليا اللومة
ان ماقمتني بتديرنــــــــي عذارة..وتقولي تلبه وغبرة وشومـــة
قلتلها حقك دايــــــــــــــــــــــم..ووالله ماعندي عليك عزايـــــم
لكن الشبح معادش العين تلايم..وماتفرز الغفلة من الميــــسومة
وبدت رفقتك ياقود غير حشايم..ماهي دواوي وبلبلة وخصومة
قالــــــــــــــــــــت فك عقالي..واقعد بلامطرود رد الــــــــتالي
وماهمتك ياشيخ كيف طرالي..مشَرتعه ولانجي ملمــــــــــومه
وبعدين نا بندير مافي بالي..وبيننا حجايج وكل حد برسومــــه
وني حجتي تاريخها لهلالي..وانت بحر صاعب عليك تعومــه

قلتلها شاهد علي عومـــــــــــــانه..وعارفك مــــتاعت سو ياشيطانة
وقديش من سامر قوي دخـــــانه..ويشهد عليك الشعر في المدلومــــه
وقديش من فارس لهد بحصانه..وباع وراك الراس بارخص سومــه
وقديش من سابق لفت جضرانه..مشت في المساق وروحت مهزومة
وقديش عيلة بايتين حزانـــــــة..سوى ظـــــــالمة ولاسوى مظلومة
وقديش ماقعدو بلا دفانــــــــة..شايـــــــــب ومتوسط وثاني صومه

اعترفت الناقة بالكلام وقالت
كله صايــــــــــــــــــــــــــــــر..ونسيت الجميل اللي عليك مطايل
وياطول مادرتو علي علايـــل..وفلقو في الدوم غرارتي مذمومة
ومرافقيني هاللي اسماح خصايل..ولجواد ديما يقسمو المحتومة
يلاقيك يضحك والوجوه بشاير..اخلاقه حميدة وحاجته متمومـه
واني ناقله الحزاز قبل الطاير..ويا شيخ ماعند معاي خصومـة
بالله تطلقني بنعمل حومــــــة..فدراج راني ماقدرت نرومــــه


قصيدة للشاعر مسعود مصباح

مشكوره ومزيدا من ابداعاتك