داروها التوانسة برافوووو

توا سمعت خبرمغادرة الرئيس التونسي للبلاد واستلام الوزير الاول لمقاليد الحكم حتى اجراء انتخابات رئاسية موعودة ما صدقت وجريت عالتلفزيون والخبر طلع حق برافو عالشعب الحرمن كل قلبي نقولها صحيح الشرارة كانت بحادث انتحار والانتحار حرام شرعا وصحيح بعض المتظاهرين أسأوا لللاحتجاجات اللي بدأت سلمية بمطالب غاية في البساطة الناس تبي تخدم بدل ماهي عاطلة عن العمل وبمؤهلات عليا اللي ركب البحر وغرق واللي انحرف واللي انتحر والليواللي واللي بس النهاية عجبتني بالرغم من كل الشعارات الوردية والخطابات ذات الديباجة الرنانة اللي اطقتها الحكومة الا ان التوانسة كملوا طريقهم لأنهم كما عبروا امام شاشات التلفزيون لا يصدقون هذه الوعود ولا ثقة لهم في الحكومة ولو كان الرئيس صادق وجاد ويحب دولته وشعبه ما غادر البلاد بهالطريقة ياللعارالخوف ليكونوا المعنيين بملف الفساد هربوا حتى هم بالفليسات ويقعد الشعب يعاني وراهم برافو عالشعب اللي اسقط حكومة رعت الفساد واضرت بالبلاد والعباد برافووووووو ياريت كل فاسد وظالم ومتجبر ومتعلق عالكرسي سوا بتعديل دستوري باطل مرره عبر انتخابات مشكوك في نزاهتها بنسبة 99% او بصحة العين وبرادة الوجه وقوة السلاح يلقى نهايته على يد شعبه وياريت التوانسة يحسنوا استغلال الظرف الراهن لصالحهم ولا يضروا بمصالحهم ومكاسبهم من هالثورة او الانتفاضة سموها ما شئتم ونشوفوهم بحال احسن ان شاء الله.رحمة الله عالشابي(اذا الشعب يوما اراد الحياة فلا بد ان يستجيب القدر *ولا بد لليل ان ينجلي ولابد للقيد ان ينكسر)

فعلا يا زينة انا سمعت بهذا الخبر وكنت نبى ننقله لكم لا كن انت سبقتينى عليه وصحة ليهم وهكذا تكون ارادة الشعوب

ان شاء الله ربي ينصرهم وينولوا مطلبهم

انشاله ربي ينصرهم

سمعت بيه الخبر أمس في الليل وهرب للسعودية هوا وعائلته
مسكين هرب المهزوم مايطلع منه
لكن التوانسة والله تريس صحة ليهم

لكن والله يسخفوا على الخنبه والانفلات الامني اللى صاير عندهم والله واجعوني هلبا الدنيا مقلوبه عندهم والسجون حرائق وموته الله المستعان ان شاء الله ربي يبعث الامن والاستقرار في بلادهم وجميع بلاد المسلمين

ماعندى مانقول الا لا حلو لاقوة الا بالله ربى ينصرهم ان شاء الله
سبحان الله التوانسة فى الدول الاوروبية ينقال عليهم لاجئين والان هو الرئيس اللجئ
الحمد الله سقط الظلم
اناا سمعت سبب تخريب المستشفيات وحرق محطة تونس هما الحكومة
يقولو هى خربت خربت

برافو عليكن ردودكن متاع ناس فاهمة الموقف صح 100% والله حتى قاعدة نبكي من مناظر السلب والنهب والقتل انا زرت تونس كذا مرة شعب راقي وعملي ومستغربة من هالفوضى بس الحلو امس سمعت ان اولاد كل حومة شكلوا فرق تحرس حومتهم من العصابات التخريبية مع ان الشعب التونسي غير مسلح وسلاح هالشباب العصي بس صحة لدينهم والخبر اللي مش حلو ان فيه مجموعات مسلحة تجول داخل العاصمة وبعض المدن الكبرى في سيارات تاكسي وامس حاطين رقم للتبليغ عنهم وسمعت كذا اتصال من المواطنين بالخصوص ونبي نقوللكم على منظر اثر فيا ياسر وبكيت لين عيت جماعة من مختلف الاعمار رافعين ايديهم علامة النصر مروا من امام قوات الجيش جندي وقف باحترام و ضربلهم التحية العسكرية وبعضهم وقف ورد بالمثل تصرف راقي وحضاري ومش غريب عالشعب التونسي الشقيق.

لو تعرفى الفيس بوك تشوفى العجب وتشوفى حاجات مشفناهاش فى القنوات التلفزيونية كيف التوانسة يهتفو والنساوين من العمارارت يهتفو ويبكو
عنوانها نتحداك ياعربى ان لم تبكى
وحدة ثانية لو كنت تعرف الحقيقة فانك سوف تبكى

يقال ان لللاعلام الالكتروني دور حقيقي في تأجيج غضب الشعب التونسي ونجاح الانتفاضة اخيراً نجح العرب في استغلال التكنولوجيا لشيء حقيقي مفيد ومرة ثانية برافووو عالتوانسة.