بدأ العد التنازلي

السلام عليكم ياشيماوات حددنا العرس بإذن الله يوم19/4 طبعا انا اعصابي جدا متوتره نحس فيه وقت هلبه ونبي ناخد رايكم في كل شئ ياحليلي نحس في روحي كأني نحلم مش قادره نفكر ان بنطلع من عيلتنا وبنمشي لعيله ثانيه كابر عليا فراق خوتي وماما وبابا هلبه هلبه وداري بتتسكر ولا زعما ماما تديرها دار خزين وتولي داري اي شئ زايد يحطوه فيها هذه اخرتها ياماما المهم أنا طبعا قاعده ماحجزتش في صاله لأن قاعده ماقررتش هل نديره العرس هنا في طرابلس ولا نديره في الزاويه أقاربنا كلهم في الزاويه نخاف مايجيني حد وفنفس الوقت صاحباتي هنايا في طرابلس ماما قتلي انتي اختاري وين تبي تديريه قولولي علي افكارحلوه وبسيطه ماتكونش اوفر للحفله خاطري ندير حاجه مميزه وغريبه والتقديم شن رايكم نقدم عصير طبيعي ولا رزاطه وعبمبر والشوكولاته انا خاطري ندير كل طاوله عليها مثلا ورد طبيعي وكل ورده فيها شوكولاته شن رايكم حلوه الفكره ولا تطلع كأنه كل طاوله عليها باقة ورد والعشاء يلي تعرف وحده كويسه تدير في الحار وحاجتها نضيفه تقولي ماتبخلش عليا ...قالو بدو يحطو في تورته صغيره علي الطاولات بدل ماتقدمي طروف كيكه ولا تقصي تورته كبيره الحق ماشفتش حد دارها بس هلبه يحكو عليها شن رايكم نديرها ولا نقدم كيكات صغيرات انزك ولا انا ندير تورته كبيره نقصه بروحي طبعا مش معاه هو والمكسرات نفكر نحطهم ع الطاولات مش في صواني نحطهم بغلافاتهم قلت هكي أسهل من تقديم مرات يقعدو لاهين وحد يروح مايشوفوشي وماياخدش والبكلاوه مرات نقول نغيرها بطرف كنافه احلى ولا شن رايكم شن تاني شن تاني بلكي نسيت حاجه وطريقة الزفه انا فكرت في حاجه غريبه الحق الفكره خديتها من النت نلبس بنوته صغيره فيلو ابيض وتلبس طاقية الساحره وتشد عصاة الساحره طبعا مع أصوات من الدي جي هذه البنيه تدير روحها كأنها خايفه وتايها تدور علي حاجه تلقى العصى السحريه طايحه ع الأرض تاخدها والعصى تلقائيا تقودها ناحية الباب وينفتح الباب طبعا الصاله بتكون مضلمه الإضائه ع البنت بس وبعد ماينفتح الباب مع الأسماء الحسنى يطلع دخان وطبعا بنعفس فيهم مش حنطلع أنا بيطلعو ولد أختي وبنت اختي بلبسهم عريس وعروسه هذا كان بو يوقفو قاعدين صغيرين وياحنه بعدها بشوي نطلع أنا ع نشيد لاإله الا الله بالدف متع حسين الجسمي قداش يعجب فيا ولا شن رايكم انتم

ان نشاء الله الف مبروك
ويارب يكمل على الخير
فكره الزفه عجبتنى هلبه وخصصوصا الزفه حسين الجسمى

شني بنقولك أنتي ماشاء الله علمتينا كيف نديرو الزفة بالطريقة الجديدة يعني مانحتاجو نضيفولك حاجة من عندنا ماشاء الله كفيتي ووفيتي وبالنسبة للتورته ديري كل وحدة بروحها خير ماتحطي تورته في كل طاولة غير تكون نازكه وقنينه أهم حاجة الفيلو يكون مستور مش الاغنية دينية وجسمك نصه عريان
ومبروك عليك أن شاء الله ربي يهنيك خسارة بتمشي وتخلينا تعودنا عليك عضوة ناشطة ومسليه الحق

الف مبروك فراشة والله خليتى دمعتى نزلت البنت مهم تقعد فى حوش بوها هى ضيفة وانى عندى خمسة بنات

اه قداش منى كلهم بيمشوا ويخلونى لكن المهم يجيها مكتوب وتتهنئ عليها

والله يافراشة لية هلبة على جو الصالات لانى الحق معاش نخش من العرى والاغانى

نبيك يافراشة فرحة عمرك تبديها بطاعة الله وعرسك يكون على السنة لان كل من عليها فان ويبقى وجهك ربك دى الجلال والاكرام

وماتغريكش الدنيا اكرمى الناس فى حدود المعقول وخلى ارضائك للناس من ارضاء الله انى عندى خوى ماشاء الله عليه ديمة ينصح فينا تصدقى يوم عرسة النور على وجهة وبالصدفة جاءت جنازة احضرها والبركة ماشاء الله تصحبة لليوم

احنى مجتمعنا لما تتكلمى هكى يقولوك خيرك تنكدى عليها فرحة عمرها يعنى لازم فرحة عمرى نغضب فيها ربى

وانى من واجبى ننصحك لانك شكلك طيوبة ومعدنك دهب وبارك الله لك وجمع بينكم بالخير

الف مبروك فراشة ويتمم عليك بالخير ما شاء الله عليك كل شي فكرتي فيه ربي يباركلك للاسف هذي حاجة خاصة كل واحد وتفكيره وطريقة تطبيقه للمناسبات .

شكرا اخياتي الله يبارك فيكم يارب أمونه زعما معادش يخليني ندخل للمنتدى لا لا مأعتقدش هو فاهم ومثقف : به جاوبوني ندير عصير طبيعي ولا رزاطه أحلى وباقي التقديم شن رايكم في يلي خططتلهcyclops:

ام مأب درت موضوع شوفيه يحكي على خطيبي دوري عليه في افتح قلبك تقريبا وين مكانها فاطمه اللبنانيه واسعارها الى كم وشن احلى حاجات عندها

امان باهى باهى امشيت للعرس وتعرفتى اكيد على المهندسة وباقى العويلة حبوبة وام ايوب وام ماب مفكرتوش في باهى باهى يجيكم يوم ونعزمكم هههههههههههههههههههههه

الف مبروك لوخيك ياام ماب

جنان بارك لله فيك وبارك الله فى كل اخواتى اللى ردو ونصحو اختنا العروسة

ربى يكملك على خير يافراشة

فكرت الزفة حلوة عجبتنى لكن الباقى منعرفش شنو جو الصالات انا ليا 10 سنوات مخشيتش لصلة مانعرفش

لكن شنو رايك اول شئ تقدميه اول مايخشو فى باب الصالة مازال مخشوش داخل اديرى طاولة صغيرة وفيها كتاب كبيرة وتربطى الكتاب بالبيرو بنسترو حلو متاع بنوتات وتحكى جنبها احلى حاجة فى دارك تحبيها والكتاب هذا توقف جنبه وحدة من اقاربك واللى تخش من البنات اللى من عمرك تقريبا يكتبولك اى كلمة ليك او نصيحة فى المستقبل ولما يخشو تستقبليهم بكوب صغغيرررررر فيه حليب وتمر باللوز هذه الفكرة شوفتها لى اسبوع وحدة صاحبتى فى هولندا دايرتها فكرة جديدة وحلوة قعدنا كلنا داخل نتكلمو على الكتاب والاستقبال تو نرجعلك بفكرة ثانية

شكل الكتابت منعرفش لو عندكم فى ليبيا او لا

الف مبروك ياعروسة ياامورة سلمهااااااااا وسلم عريسك انا من رائي الرزاطة والعبمبر والبكلاوة مايتعلاش عليهم وكان خاطرك باديري العصير الطبيعي ديريه في نهاية الحفلة يعني حطي في حسابك انك اتعشي الناس بكري وبعدين فرقي ياحنة العصير الطبيعي وكان هذا مش لازم منه وبالنسبة للطورطة فعلا احنا درناها في عرس خوي فكرة كويسة غر مااديرهاش كبيرة غر ايخلوها والفساد حرام في مدام شفيقة كانها قاعدة تسكن في ابونواس اكيد تعرفيها الحق طورطتها مش عادية غر قوليلها ماتكبرهاش بس والف الف مبروك وبالنسبة للحار في دكتورة اسمها سلمى هي دكتورة اطفال في الجلاء وفاتحة معمل للحار الحق حاجاتها نظيفة وحلوة وربي ايهنيك ان شاء الله

انا بنت خالي هديت للحضور مصحف صغير وفكرة حلوة حتى هادي

الف مبروك يا فراشتنا ما شاء الله عليك توتي لعرسك ربي يهنيك

مش تتجوزي وتنسينا

فكرة الزفه عجبتني هلبه

ورايئ تفرقي روزاطه وعبمبر احلى

وبالنسبه للعشي احني في محضر خوي عجبتنا فاطمه اللبنانيه

وان شاء الله ربي يكملك على خير

شكرا ليكم علي دعمكم ليا شوشو فكرة الحليب والتمر مامرتش عليا قبل بس كتاب الذكريات فكره حلوه عجبتني أم لين حتى أنا مرات نقول الرزاطه والعبمبر مايتعلاش عليهم قلت مرات بعد العشي نقدم فروته نحس فيها قريبه من العصير لأن هلبه نقدم عصير طبيعي ورزاطه وبالنسبه لشفيقه هذه جارتنا كان شفتي حوشها نحنا الحوش يلي مقابله لونه زي الياجوري بس فعلا تورطاته مايعلاش عليهم حتى فكرة المصحف حلوه بس ياحليلي قداش بندير حاجه مرات البطاقه ندير معاها مصحف صغير الله يبارك فيكم كلكم حبوبه وين مكانها اللبنانيه

ربي يتمملك على خير يافراشة
الف الف مبروك

قاعدة مدام شفيقة واللا لا زعمة ووقت الثورة سافرت زعمة لمصر وهي ولدها ماشاء الله ملتزم اشبح شن صار فيهم بالله شن اخبارها يافراشة طمنيني عليها انا زبونتها وديمة ناخذ منها الحق ماشاء الله عليها

ألف ألف مبروك يا فراشة ربي يكمل عليك بالخير ويسعدك يارب

الحق كفيتي ووفيتي ما شاء الله وأفكارك تبارك الرحمن

مبروك فراااشة وان شاء الله يسلامتك ...ياريت نسكن قريب منكم كنت جيت وحضرت العررررس

ربي يحفظكم كلكم بارك الله فيكم ويارب تفرحو ببنياتكم كلي أمل قصدك مش ح تحضري عرسي نتمنى من قلبي ان كل اخياتي يلي هنا في المنتدى يجو يشاركوني فرحتي والله مستعده نرفعلكم بطاقاتكم الى الحوش أم لين شفيقه قاعده ماسافرتش اخبارهم تمام وولدها تزوج ليه قريب سنتين وعنده بنيه زي العسل وتقريبا مرته قريت تجيب ثاني شكرا أم مأب ع النعته

يا صبااااااايا باي مزين تنصحوني سهى الحسناء ولا فاطمه شعيب ولا الملكه ولا ناديه الجزائريه بالنسبه للصاله حجزت في ليلتي في رالزاويه ماتقولوليش بعيد وماتقدروش تجو

اسمعي فراشة فكيني منه موضوعك هذا وين نشوف العنوان لحمي ينوض شوك شوك
فرحنه طبعا فرحنه بتمشي وتخلينا لكن معليشي هذي سنة الحياة الله غالب علينا نصبرو وخلاص
نصبرو ياعيني ياعيني واجب علينا نصبرو ياعيني اه ياعيني واجب علينا هذي اغنية راهو

قاعدة نادية الجزائرية الللللللللله مابعد سنينك يافراشة من عرسي هذي مدايرتلي التسريحة مقدمها المرا هذي اكيد توا عزوز مكمله

غير قداش ليك متزوجه مش حنغيب ع المنتدى اكيد بنقعد متواصله معاكم بس طبعا الا فتره شهر العسل بنمشو لتركيا هذه هدية بابا وهو قالي بعدها بنمشو لماليزيا علشان خويا يقرأ غادي ومش حيحضر العرس قالي بنمشو نديرو عرس ثاني معانا نرفعو معانا الكازانات والخيم و نأخرو مليزيين نعزموهم ع العرس

بصراحهة يا فراشه اني تعجبني اكثر وحده نجوى التليسي يعجبوني عرايسها هلبه

وفاطمه شعيب بصراحه ما انشجعكش عليها هلبه

حتى سهى الحسناء عرايسها حلوات

شن رايكم في بريجيت شفت عروساتها كلهم حلوات نجوى التليسي حتى هى حلوه نسيتها ياشيماوات بما أن الأغلبيه قالي الروزاطه والعبمبر مايعلاش عليها قلت نقدم بعد العشاء فروته شن رايكم نقدم بعدها بكلاوه ولا هى تكفي وبالنسبه للشاي شفت كنافه بالقشده عجبتي قلت مرات نقدمها بدل الكيكه نحس فيها الكيكات ماياكلوش فيهم ولا شن رايكم

ربي يتمم عليك بخير وخيتي
وان شاء الله تطلع حفلتك كيف ماتبي