ماذاأعددتى على سفرة الافطار اليوم

كليتها يا ام ايوب الله غالب ههههههههههههههههههههههههه
تفضلي يا ام ايوب
اني اندير فيها بالنسكافة يقولوا باللوز احلىلكن اني منحباش

اندير في ظرفين كريم شانتي ونضرب فيهم مع 200مل حليب ومعاهم بانو جبنة فيلادلفيا وكاشيك كبيرة قشطة نضربهم في الخلاط
وناخد سحن غارق فيه امية دافية شوي اني نحط فيه نسكافة لكن فيه اللي يديروا في الماية عصير لوز المهم ناخد البشكوتي الصادا تنقعي في الماية وتستفي في الطاجين مش لين يدوب وفي نفس الوقت ميقعدش يابس اديري الطبقة الاولى وديري فوقهم طبقة من الكريمة شانتي وطبقة بشكوتي وهكذا اني اندير في 4طبقات بشكوتي واخر طبقة بشكوتي اندير فوقها كاشكين كبار من الكريمة ونخلط معاهم كاشكين نوتيلا وكاشيك صغيرة قشطة وكاشيك كبيرة حليب نستلة نخلطهم ونديرهم فوق الطبقة الاخيرة من البشكوتي وترشي لوز والا فستق مهروش وتنحط في الفريز ولما بتقدميها اطلعيها قبلها بدقيقتين
وصحتين

على فكرة ام ايوب انطيب في الكيكة لكن مطيبيش من الوسط وكم من مرة ومش عارفة شن السبب

ام الحلوين صحيتى على الطريقة
ام الحلوين بالنسبة للكيكة طيبيها على درجة 180 وحاولى متفتحيش عليها الكوشة ومتحطيهاش في الكوشة لين تسخنيها قبل وحطيها في المنتصف مش لوطة وان شاء الله المرة الجاية اتطيب واتجيك باهية

ان شاء الله مشكورة يا ام ايوب

فطورى اليوم بازين
وعندى نواشف من قبل طلعتهم لصغار وحريرة متاع امس
وراجلى يتوحم على الغليظ

اني اليوم شربة وكلوني وبيتزا وبوريك

ضحكتيني يا امن الشوش يتوحم هلبة انتي وياه
عموما كلهم يتوحموا انا زوجي متوحم على المكرونة كل الايام اللي فاتت
واليوم فطوري ضولمة ومحش تبع امس وطعمية وطاجين
ومكرونة

اليوم طيبت متاخر قريب اللي قعدنا بلا فطور وحسبت معانا جارنا كان مسافر ووصل اليوم عراقي

في اكلة عندهم اسمها تشريبة دجاج درتها ودرت معاها رز ابيض ودجاج محمر وهو خاطره في بامية العراقيين يموتوا فيها

درت بامية علي لحم وسلاطة وباهي اللي صار منه الفطور

صحه فطوركم كلكم

اني اليوم شربة حوت وشربه عاديه وعصبان وبوريك

ام الحلويين انتي اكيد تفتحي على الكيكه هذا علاش ما طيبش لااازم تسخني الكوشه قبل ولمه تحطيها ما تفتحيش عليها بس هذا السبب

ان شاء الله المره الجايه تضبط معاك

لالالاوالله قبل 35 دقيقة والله مانفتحش عليها لكن ديمة هكي حتى في الكيكة العادية ديمة هكي من الوسط ناقصة اطيب

صحة فطوكم نبي انقولك ياام الحلوين انتي نفس نظامنا الغاز انا عارفة

الغاز زي ماقاللولك ام ايوب وحبوبة سخنيه يعني لما تبي تبدي تخلطي المقادير اولعيه

بعدها دائما درجة الحرارة للحلويات وبالذات للكيكة 175 وماتفتحيش بكل عليها اسمعيني احسن لا 35 لا غيره

والوقت ديمة حوالي50 دقيقة وماترفعيهاش واجد خليها علي اول تدريج لان اكيد نفس الغيزان راهو لان الضي يختلف

علي الغاز امتاع البمببة واجد انا طولت وماخذيت عليه بس هو احسن وديمة حاولي الكباية والكاشيك ماتكونش فيه ميه

والبيض طلعيه قبل ساعة عشان يقعد نفس درجة حرارة المكان لان برودة البيض تساهم في عدم نضج الكيك من وسط

وبعد اتكملي دائما مشي الكاشيك علي السطح امتاع الكيك عشان الفقاقيع هي تخلي الكيك يرتفع بعدها يهبط

انا حكيت واجد بس لازم ضروري لاني حاسة بيك وخاصة هنا الواحد مايقدرش يشري ديمة من المحلات

وموفقة

ياريت تقولولي شن اندير الفطور؟؟؟؟؟

والله حالة يا مرام من سنتين واني مجتنيش كيكة كويسة كله في الوسط مينفعش لكن ان شاء الله انجرب اللي قلتيلي عليه لكن اني شاكة في شئ ان كوشتي تولع من فوق ومن لوطا مع بعض والمفروض انولعها من لوطا قبل صح والا لا

مرحبا ام الحلوين مدام الفرن يولع من فوق وتحت في مرة وحدة معناها هي هذي المشكلة
لازم الكيكة تطيباها من تحت قبل على نار خفيفة جدا وبعدين تشغلي من فوق والله تجيك تهبل

انسيت فطوري اليوم امبطن وبيتزا وخبيزة محشية وشربة

صحة فطوركم وسبحان الله نص رمضان فات ان شاءالله ربي يفرجها علي امة لا اله الا الله

انا اليوم فطوري مكرونة وبيتزا مشبكة وفلفل حشو وسلاطة ومادرتش شربة لانه عندي وراجلي مايحبهاش واجد

ام الحلوين هو كل واحد ووجهه نظره بس انا انقولك من اول ماجيت للسويد وانا نفتح من فوق وتحت مع بعضه ونخلي

فيه زي ماقتلك في الدرج الاول عشان انتي عارفة من فوق بسرعة مااطيب لذلك نخلي فيها قريبة من تحت

واي سؤال انجاوبك انا نجرب واااااجد لعند ماتصلح الحاجة وكل يوم نكتشف حاجة

هههههههههههههههههههههه

مش يقولوا في السفر فوائد

صحه فطوركم جميعا وربي يديمها نعمه على الجميع

اني اليوم فطر عندي خوي الغالي وراجل حماتي ودرت شربة عاديه وشربة حوت ومبطن وكنالوني وبوريك دجاج ودجاج محمر في الكوشه وبيتزا وسخنت معاهم عصبان من امس

والحلو للاسف مالحقتش جاب راجلي من بره هههههههه عارفتكم بتقولو عليا بايره لكن والله مالحقت من الصغار المهم جاب كيكه بالكستارده وبكلاوه وكنافه بالقشطه

اني صورت الفطور لكن والله مانعرف نزل الصور توا نشوف كان عرفت نزلهم

صحة فطوركم جميعا
انى اليوم فطورى شربة بيضة وبيتسة وخبيزة محشية وبوريك وكانلونى وسلاطة
والحلو اليوم درت قطائف وجارتى بعتتلى بسبوسة
ويا المميزة اليوم درت طريقتك في الكنافة جربتها بعد الفطور وجتنى حلوة لكن مش زى كنافتك مازال انتى لما ضقتها احلى بهلبة
لكن ان شاء الله المرة الجاية اتجينى احلى مش مايسة مازال بنحاول

صحة فطوركم جميعا
انا اليوم فطورى شربة حوت وطاجين حوت حشاكم وبيتزا امطبقة امنقلة من حبوبة ههههههههه
والحلو بسبوسة باردة بالكستردة
ام ايوب لايأس مع الكنافة وانا متأكدة انها جاتك حلوة من اول مرة تسلم ايدياتك

فطوري اليوم شربة وبازين زوجي قالي ياسر من التفتف الا جابنا المرض

فطوري امس هههههههههههههههه
حريرة وكبسة وشاورما دجاج وبيتزا وسندوشات الطست

فطوري امس

كفتة بالبصلة وشربة حريرة المغربية وبطاطا مقلية وسلاطة

والحلو

كنافة وبسبوسة

وسلامتكم

دعواتكم ربي يسهل عليا بديت نحس بالثقل

الله يسهل ع الجميع

اليوم مكرونة وشربة وبراك وبس

الحق الحق مرضنا رمضان بالماكلة

فطورى اليوم رز ابيض وقلاية وشربة

صحة فطوركن ياغاليات

اليوم قلاية ورز ابيض وتورتة بطاطا ولفائف الباذنجان بالمفروم وعندي من امس بيتزا مشبكة

وين الصور معش نزلتوا ؟؟؟؟؟

صحة فطوركم
مرام قوليلي طريقة تورتة البطاطا

صحه فطوركم

اني اليوم متلاقين اني وخواتي في حوشنا والفطور شربه ورز بالخلطه وعصبان وكفتة دجاج وامبطن وبوريك وافخيدات الدجاج وبيتزا وخبزه ملفوفه

وام ايوب صورة الفطور تواء ان شاء الله تنزل الصور

والله كانت سهره مش عاديه تعرفو اني وصلت للحوش الساعه اربعه وثلث