سلسله قصص واقعية

السلام عليكم ورحمه الله وبركاته




موضوعي او فكرته هي انه شن رايكم كل وحده تخش تكتب تجربه مرت بيها في حياتها
او قصه لوحده تعرفها فيها عبره وموعضه
نفيدوا بيها غيرنا خاصه البنوتات اللي قاعدين كيف بيدوا في حياتهم نكونو ليهم خوات و
ونشاركوهم باللي عندنا


انا والعياد من كلمه انا زي اي بنت مريت بعده مواقف وعلاقات كانت ليها بصمات في حياتي
منها السلبي ومنها الايجابي

من تجاربي
اني كنت نشتغل مهندسه في شركه اول ماتخرجت وقبل ماننتقل للتعليم
بجد تعلمت هلبه وشفت هلبه
شفت الناس المتعلمه والجاهله واللي نص نص
عايشت الاختلاط وما يحويه من عيوب ونتائج غير مبشره


من المواقف اللي تحز في نفسي والي مانحبش حتى نتذكرها ولاول مرة نقولها
هي اني اول ما اشتغلت كنت محط انظار بصفتي وجه جديد ولاني كنت نحب نلبس
وكانت في عروض كثيره تجيني من ظمنها شخص كان يشتغل في قسم تاني
بعتلي مرة وتنين وعشره وانا مش عاجبني والله مانبالغ قعد سنه نم دون ما ييئس
في الاخير قنعوني البنات وقالولي المهم انه يحبك وشاد فيك والحب يجي بعدين
قلت اوكي وفتحتله المجال اني نتكلم معاه بالتلفون وبين اخد وعطا
مشى الوقت في الهدرزة
لين جي يوم بدي يتهرب ومعاش يرد عليا وعرفت انه عرسه الاسبوع الجاي
يعني علاقته كلها كلها كانت بس باش يطيحلي خشمي وهذا اللي فهمته متاخر

صدقوني انا مش نادمه عليه لاني في الاصل محبيتاش ولان ربي اعطاني اروع واحن زوج في العالم بنظري
بس لما نتدكرها توجعني نفسي والموقف اللي حطيتها فيه

يا حول الله قداش في وحده مرت بموقف زي هذا اكيد هلبه
وهلبه وهلبه باشكال وانواع مختلفه
حبيت نحكيه بس زي ماقلت حتى نفيد غيري
واناكد ان الله سبحانه وتعالى حرم الاختلاط لحكمه من عنده
وان اللي يبيك يجيك للحوش طول مش من الشباك
والله نتحسر لما نشوف بنات توا وان من السهل جدا الضحك عليهم
ويا ريت يقنعوا ان نصيبهم حيجي لعندهم ولو كان في اخر الدنيا




خليك جريئه وشاركينا قصتك او قصه وحده تعرفيها او سامعه بيه
عندي هلبه قصص لصديقاتي وفي منهم اللي سامعتهم من واحد لواحد

كل مرة توا نكتب حاجه

وانتوا يلا شاركوني

كويس بيلا
ربي يتممك بعقلك

بس مش مهم الواحد يغلط
المهم انه يتعلم ويعتبر

بس ممكن تشاركينا ولو بقصه لحد ثاني عايشتيها او سامعتيها

شكرا سناء
ونستنى تنوريني بمشاركتك

موظفة في الشركة بحكم عملي وهي في فرع تاني في منطقة ثانية عالتليفون وصرنا كلما نلقوا وقت نهدرزوا مع بعض الحق اني ارتحتلها وهي اكبر مني بياسر متزوجة وعندها صغار وكانت ديما تقولي انها مستغربة اني ما زلت ما تزوجت! كانت شايفة فيا مواصفات كويسة ومرة طلبت مني تعرف شن شكلي اعتبرت الشي طبيعي تعرفني بالصوت بس فوصفتلها نفسي بكل تواضع ومرت فترة لقيتها تتصل بيا وتقولي فيه واحد بيتصل بيك من طرفي ونبيك تخدميه قلتلها انتي تأمري وعطتني اسمه ثاني يوم اتصل وسلم عليا وبعدين قالي اكيد عندك فكرة ليش انا نتصل قتله ايه (.....)قالتلي انك تبي خدمة أأمر اي حد من طرفها نخدمه بعيوني قالي هي هكي احرجتني وحطت الكورة في ملعبي قتله ما فيها احراج تفضل الحق حسيت انه فيه عريس في السكة بس قلت ندير حركات الاستعباط! المهم قالي (...) قالت لي عنك وعن اخلاقك واصلك الطيب ووو...... وانا راجل مالياش في العلاقات والجو هذا ولما قالتلي انك ملتزمة ومن نفس النوع اشجعت وقلتلها فاتحيها نبي نتعرف عليها لغرض الزواج وخبرني عن علاقته بيهم هو يكون صديق راجلها طبعا فرحت فرحة لكبد السما لكني بكل هدوء ورزانة قتله ان التعارف بيكون في اضيق الحدود تفضل خبرني عن نفسك واذا عندك اي سؤال انا حاضرة نجاوبك عليه وخبرني قصة حياته وما لقيت فيه اي عيوب وبالنتيجة سألني عن ال cv وانا خبرته وسكرت السماعة واستحمدت عالنصيب اللي جاني لعندي بلا قصص حب و غرام ودوة فاضية وهذا اللي انا نبيه المهم على طول كلمتها ودرت روحي انحرجت وليش ما قلتيلي من الاول ومن هالكلام وهي تعذرت بخوفها اني ما نوافق نكلمه اذا عرفت بنيته مسبقا المهم ما كذبت خبر اتصلت بأعز صديقاتي وقلتلها عالخبر واعطيتها اسمه وعنوانه وطلبت منها تسأل عنه لأنها تعرف واحد من نفس المنطقة بحكم عملها واتصلت بشخص موثوق نعرفه وحتى هو طلبت منه يتحرى عنه وهالشي خدا ايام على بين ما ردوا لي خبر وكل كل يوم يتصل بيا زعميته يطمن عليا وقال سأل عني وعن اهلي وياما شكروا فينا وما ناقص غير يشوفني باش تكمل الصورة عنده قتله ما تحلم نبعثلك صورة والا نضربلك موعد فما لقا طريقة غير انه يبعث (...) باش تشوفني وتنقل له صورة حية عني ومن حظه البنت كان ليها اخت ساكنة في منطقتنا فجتها زيارة ومرت عليا البيت ودرتلها عزومة عالغدا على كيف كيفك وما خبرت اي من هلي عالموضوع لين يكمل ولما جت تفاجأت بيا الباين كانت متوقعتني شينة وعاد انا مفتلكة روحي نحسابه حق المهم خبراته باللي راته عندنا واتصل بيا قال خلاص بنبعث هلي قتله لازم نتأكد من الصورة بالك ما عجبتني وانا فعلا ما كنت سألت عن شكله الفرحة نستني المهم سألتها عطتني عبارات فضفاضة ما تفهمي منها شي انا فهمت انه ما هو سمح قلت احسن باش ما يشبح روحه عليا وهنا جاني الرد من صاحبتي ومن الراجل الموثوق في نفس النهار وزي ما يقولوا ضربتين عالراس توجع كل اللي قاله كذب لا عنده شقة في طرابلس ولا يبني في بيت بحدا هله ولا سيارته كامري ولا يشتغل في اللجنة الشعبية العامة ولا ولا ولا....واحد صايع استغنوا عن خدماته بسبب غيابه بلا مبرر ونصاب كبير دار تشاركية مقاولات خسرت ومديون وبيت هله طوب حتى مش صحي وشكله احلى من الغول بشوي ووو..... انقهرت في عمري معقولة البنت ما تعرفه على حقيقته وانخدعت فيه والا شن الحكاية ولأني نبي رد محكم ونهائي استنيت قبل ما ننفجر فيهم الاثنين وفي هالاثناء كان يتصل بيا مرات ومرات وانا ما نردش عليه ما نبيش نغلط فيه المهم كلمت اول شي البنت وانفجرت في وجهها بالحقائق اللي عندي فحلفت وتقطعت انه صاحب راجلها وما رت منه غير كل خير يجيهم في سيارات اخر موديل وايديه مليانة وكل يوم في مكان ولما قاللها نبي مرا خطرت في بالها طول من محبتها ليا صدقتها بس انهيت علاقتي معاها للأبد وجا دوره هو اتصلت بيه وفرح المسكين وجا بيلوم عليا قال استحاشني كم يوم ما سمع صوتي ....تستاحشه الحمى ....المهم قتله اني خبرت هلي عنك وهم بعثوا خوي لبلادكم عشان يسأل عنك لأنهم ما يوثقوا في حد يقوللهم الحقيقة واني غالية عند هلي وما يبوا يطلقوني غير للي فعلا يستاهلني(كذبت باش يعرف انا وراي ناس)ولما سألوا عنك ماحد قال فيك كلام باهي وكل القصص اللي حكيتهن طلعن كذب في كذب حشمتني قدام هلي قلتلهم جايني عريس يسوا طلعت ولا شي حتى خوي كان بيدورك بيتعارك معاك غير ولد خالي قاله عيب .المسكين خاف وارتبك وقالي بلادنا بلاد حسد وكلهم ما يحبوني وقعد يرقع في القصص القديمة عن الوظيفة والاملاك وعذر اقبح من ذنب قتله باختصار مافيه نصيب بينا وسكرت السماعة وانا نرعش من كذبي عليه ومن خيبتي فيه وتعلمت ما عاد نصدق غير اللي نشوفه بعيوني طول عمري نحلم ناخد راجل بلا علاقة مسبقة وفرحت لما جاني هالعريس الغفلة وقلت ما زال فيه ناس تسلك الطرق المستقيمة بس فرحتي ماتمت